Umugaba w’Ingabo z’u Rwanda zirwanira ku butaka, Maj Gen Frank Kamanzi Mushyo wazakiriye ku kibuga cy’indege mu izina ry’Umugaba Mukuru w’Ingabo z’u Rwanda Gen Patrick Nyamvumba, yabashimiye akazi keza bakoze mu mezi 12 bari bamaze mu butumwa.

Yagize ati “twakurikiranaga ibikorwa byanyu, kandi raporo zigaragaza ko mwakoze neza, twaje hano rero kubifuriza ikaze no kubashimira, mu izina ry’ubuyobozi bwa RDF no mu izina ry’Abanyarwanda muri rusange”.

Umugaba w’ingabo zirwanira ku butaka yasabye abasirikare bavuye mu butumwa gukomeza imyitwarire myiza iranga ingabo za RDF no kuguma kuri gahunda mu gihe bagitegereje akandi kazi mu gihugu.

Umuvugizi w’Ingabo z’u Rwanda, Brigadier General Joseph Nzabamwita nawe yashimiye Ingabo z’u Rwanda akazi keza bakoze cyane cyane bakorera abaturage b’aho bakoreraga mu butumwa bwo kubunga amahoro.

Yagize ati “ Iyo tugiye mu butumwa hanze y’igihugu, tujyanayo ubunyamwuga buhanitse no kutabogama. Tujyana ubutumwa bw’u Rwanda, indangagaciro z’u Rwanda z’uburyo bwo gukemura ibibazo, dufasha abaturage ndetse n’ubuyobozi bwiza bw’iki gihugu. Mu butumwa bw’amahoro, twifashisha ubunararibonye bw’imiyoborere myiza n’uburyo bwo kwikemurira ibibazo mu Rwanda”.

Umuvugizi wa RDF yongeyeho ko begera buri ruhande ruri mu makimbirane ati “ibi kandi abyubaka icyizere hagati y’abari mu butumwa bwo kubungabunga amahoro n’abaturage bakorera”.

Ingabo z’u Rwanda zikubutse mu butumwa bwo kubungabunga amahoro, uretse ibikorwa byo gucunga umutekano bakoreye ibindi bikorwa Abanyasudani birimo kubaka ibyumba bine by’amashuri, basana ibitaro kandi bavura abaturage.

Ingabo z’u Rwanda zageze i Kigali kuwa 27 Gashyantare zari zaragiye mu butumwa bwo kubunga amahoro muri Sudani y’Epfo kuwa 15 Gashyantare 2013. Indi batayo ya RDF iyobowe na Col Nkangura Mutara, nayo yageze muri Sudani y’Epfo gusimbura abaje kuwa 27 Gashyantare 2014.

Kigali Today