Umunyamabanga uhoraho muri minisiteri ishinzwe gucunga ibiza n’impunzi, Antoine Ruvebana, avuga ko ubusanzwe bari barateganije ko mu nkambi ya Kigeme hazatuzwa impunzi ibihumbi 13 zaba nyinshi zikaba ibihumbi 14, ariko ubu zimaze kugera ku bihumbi bisaga 17.

Mbere inkambi ya Kigeme yari ntoya nka hegitari ziri hagati y’esheshatu na zirindwi yabagamo impunzi z’Abarundi baza gusubira iwabo mu mwaka wa 2009.

Aho impunzi z’Abanyekongo zitangiye kuhazanwa, itorero ry’Abangirikani ryatanze hegitari 8 ndetse na Leta y’u Rwanda igura izindi zirenga 10 yagurwa, ubu hakaba nta hantu hasigaye ho kugurwa.

Ruvebana atangaza ko bagerageje kureba izindi nkambi zakwagurwa bakaza gusanga iya Nyabiheke ariyo yashoboka, dore ko hari n’ubutaka bungana na hegitari ebyiri n’igice budatujweho abantu.

Agira ati “Ni Nyabiheke duteganya kuzimurira niho twabonye hakiri umwanya mu nkambi. Hari ubutaka twari twaraguze twari tutaratuzaho impunzi. Dufatanije na UNHCR hagiye gutangira kubakwa ku buryo impunzi ziri Nkamira dutangira kuzimura”.

Akomeza atangaza ko ubwo butaka leta ihafite nabwo ari buto bityo bakaba bateganya kugura ubundi butaka bungana na hegitari 23.

Ngo hari kuba ubwumvikane n’abaturage harebwa ubutaka bwa buri muntu n’agaciro kabwo, nyuma Leta ikazashaka amafaranga yo kubishyura hagatangira kubakwa kugira ngo izo mpunzi zihatuzwe, ibi bikaba bizamara nk’igihe kiri hagati y’ukwezi n’ukwezi n’igice.

Inkambi ya Nyabiheke isanzwemo impunzi ibihumbi 11 bikaba biteganijwe ko hazatuzwa indi mpunzi ibihumbi icumi, ubu izisaga gato ibihumbi 8 zikaba ziri mu nkambi y’agateganyo ya Nkamira zitegereje kwimurwa.

Emmanuel Nshimiyimana