Perezida Kagame watumiwe nk’umuyobozi w’icyubahiro kandi wagenewe impamyabumenyi y’ikirenga “the Honorary Doctorate of Humane Letters” yashimiwe uruhare yagaragaje mu guteza imbere u Rwanda muri rusange ndetse no guteza imbere urubyiruko n’abagore by’umwihariko. Ku isi, u Rwanda rurashimwa kubera guha agaciro abagore no kubagenera imyanya mu buyobozi.

U Rwanda rufatwa nk’intangarugero ku mugabane w’Afurika kubera ibyiza rumaze kugeraho rubikesha no kwihuta mu iterambere kubera imiyoborere myiza yagezweho bigizwemo uruhare na Perezida Kagame; nk’uko byatangajwe na Dr. Ann Fields umwe mubayobozi ba kaminuza ya William Penn University.

Yakira impamyabumenyi yagenewe, Perezida Kagame yashimiye Abanyarwanda kubera uruhare rwabo mu gushaka kwikura mu bibazo no kwihuta mu iterambere. Muri uwo muhango kandi hatanzwe impamyabumenyi ku banyeshyuri barenga 300 bayirangijemo barimo n’Abanyarwanda.

Perezida Kagame yemeza ko ibyo abanyamahanga babona ku Rwanda atari ibitangaza ahubwo ko Abanyarwanda babiharanira kandi bigakomeza kugerwaho ku bufatanye bwabo.

U Rwanda nk’igihugu cyamenyekanye cyane kubera Jenoside ubu kikaba kimenyekana kubera iterambere n’imiyoborere myiza ndetse n’umusanzu u Rwanda rutanga mu bindi bihugu byahuye n’amakuba nka Sudan, Haiti aho Abanyarwanda bagaragaza imyitwarire myiza n’ubunararibonye mu gucyemura ibibazo.

Umwe mu Banyarwanda barangije muri William Penn University, Jean Chrysostome Bikomeye avuga ko yishimiye kugaruka mu Rwanda agakoresha ubumenyi akuye muri iyi kaminuza hamwe na bagenzi be.
William Penn University yashinzwe mu 1873 ikaba ari imwe mu makaminuza akomeye mu gutanga uburezi mu masomo y’ubumenyi.

Sylidio Sebuharara