Ikibazo cya ba rushimusi bahiga inyamaswa zo muri iyo pariki kimaze igihe kinini kivugwa. Nubwo ifite abarinzi bayirindira umutekano ntibyabuzaga bamwe muri ba rushimusi kuyinjiramo, bamwe bagafatwa abandi ntibafatwe.

Izi ni zimwe mu mbwa zatorejwe kunganira abarinzi ba Pariki y’Akagera mu gucunga umutakano wayo.

Cyakora iki kibazo kimaze kugabanuka nyuma y’uko iyo pariki ishyiriweho uruzitiro ruyitandukanya n’abaturage.

Kuri ubu ariko, ubuyobozi bwa pariki bufite gahunda yo kwifashisha imbwa zatorejwe gucunga umutekano zizifashishwa mu kunganira abarinzi b’iyo pariki mu rwego rwo guhashya burundu ba rushimusi binjiraga muri pariki.

Bamwe mu baturiye Parike y’Akagera bavuga ko bamaze gusobanukirwa n’akamaro ibafitiye ku buryo basigaye bafatanya n’ubuyobozi bwayo guhashya ba rushimusi bjya kuyangiza nk’uko Kamari Lazaro wo mu Murenge wa Ndego mu Karere ka Kayonza abivuga.

Kamari, kimwe na bagenzi be, bo mu Murenge wa Ndego bavuga ko ubuyobozi bwa Pariki y’Akagera bubagenera ku musaruro w’ibikomoka ku bukerarugendo buyikorerwamo, amafaranga bagenerwa agakoreshwa mu kubaka ibikorwa biri mu nyungu rusange nk’amashuri n’amavuriro.

Ibyo ngo bituma abaturage bamaganira kure uwo ari we wese babonye ashaka kwangiza ibikorwa bya pariki bitewe n’uko bamenye akamaro kayo.

Nubwo abaturage batangiye kugaragaza uruhare rwabo mu kubungabunga ibikorwa bya Pariki y’Akagera, umuyobozi wayo, Jes Gruner, asaba abaturage gukorana bya hafi n’ubuyobozi bwa pariki ndetse bagatanga amakuru ku buryo bwihuse igihe babonye hari inyamaswa ishobora guteza ikibazo cyane cyane muri iki gihe isigaye ifite intare zifatwa nk’inyamswa z’inkazi.

Cyprien M. Ngendahimana