Nk’uko Habamenshi Emmanuel, umwe mu babonye iyo mpanuka yabaye ahagana saa sita z’amanywa kuri uyu wa kane tariki 23/5/2013 abisobanura, ngo nta witabye Imana, ariko ngo abagore babiri barimo umwe utwite bakomeretse bikabije.

Umuntu wa gatatu iyo kamyo ifite icyapa cya RAB 903B yari ihitanye, ni umwana w’umukobwa wavaga kwiga, n’ubwo nta gikomere kigaragara inyuma, hari abakeka ko yaviriye imbere mu mubiri.

Hari n’abakeka ko iyo kamyo yaba hari umuntu ihishe munsi y’ahantu yangirikiye, kuko ngo yari ifite umuvuduko munini ubwo yasunikaga igikuta.

Imana ngo yakinze ukuboko, kuko ngo ukurikije urujya n’uruza rw’ibinyabiziga n’abantu benshi baba bagendagenda mu mihanda ya Nyabugogo, iyo kamyo yari guhitana benshi.

Shoferi wari utwaye iyo modoka ntacyo yabaye. Ngo yamaze kubona arenze isoko kandi yambutse umuhanda wa kaburimbo wa Nyabugogo, ahitamo gusimbuka, areka imodoka isekura igikuta cy’amabuye kiri iruhande rwa stasiyo yitwa SP, kikaba aricyo cyayitangiriye.

Polisi y’igihugu isaba ko abatwara ibinyabiziga bajya babanza kubigenzura mbere yo kugira aho bajya, kandi bakitabira kubijyana ku kigo kigenzura ibinyabiziga cyitwa ‘Controle Technique Automobile’.

Simon Kamuzinzi