Ni kenshi bamwe mu baturage bagiye bagaragaza ko hari serivisi batishimira bitewe n’uburyo zitangwamo cyangwa ibyangombwa byo kuzihabwa. Ni muri urwo rwego mu kwezi kwa Gatandatu Guverinoma yashyizweho itsinda ryo gukurikirana ibibazo nk’ibyo.

Iryo tsinda rigizwe n’ibigo bitanu bya Leta ari byo Ikigo cy’Iiguhugu cy’Iterambere (RDB), Minsiteri y’Ubucuruzi (MINICOM), Minisiteri y’Umutungo kamere (MINIRENA) na Minisiteri y’Ubutegetsi bw’Igihugu (MINALOC) n’Umwe mu bikorera n’undi uhagariye Urugaga rw’Abikorera.

Mu kiganiro n’abanyamakuru kuri uyu wa gatanu tariki 26/07/2013, Minisitiri muri MINICOM, Francois Kanimba yatangaje ko bafite inshingano zo gukusanya amakuru ku byangombwa bisabwa muri serivisi zakwa abaturage niba bigendanye n’igihe cyangwa bikenewe.

Yagize ati: “Iryo tsinda ishingano ryahawe ni ugusuzuma ibintu bisabwa abaturage kugira ngo babone serivisi cyane cyane serivisi za Leta. Iyo urebye amategeko u Rwanda rugenderaho hari gihe usanga amategeko adahinduka nk’uko ibihe bihinduka.

Ugasanga mu mategeko amwe n’amwe hari ibintu bisabwa abaturage ariko mu by’ukuri hari ibiba bitakijyanye n’igihe ari ukubatesha igihe, umwanya ndetse n’amafaranga kuko hari n’ibisaba amafaranga.”
Iryo tsinda rifite amezi atatu yo gukusanya amakuru no guhagarika zimwe muri ibyo bidakenewe.

Zimwe mu ngero yatanze ni nk’igihe banki zasabaga abaturage ibyangombwa biturutse mu ma banki yose kugira ngo bahabwe inguzanyo. Abaturage bikabagora kubona ibyo byangombwa kuko byabasabaga kuzenguruka buri banki ikorera mu Rwanda.

Iyi gahunda yiswe Noza Serivisi izajyana n’ubukangurambaga mu bikorwa bitandukanye. nk’ibiganiro mu tangamazamakuru, inama zizaba zateguwe, kohereza ubutumwa bugufi no mu miganda ya buri kwezi.

Buri muturage wese asabwe gutanga igitekerezo cye ku cyo abona kidakenewe mu byangombwa bisabwa muri buri rwego rwa Leta , kugira ngo serivisi irusheho kunozwa.

Emmanuel N. Hitimana