Mu nteko itora y’abarwanashyaka ba PL mu Ntara y’Iburasirazuba bagera ku 128, Bwana Nzabonimana yegukanye intsinzi ku majwi 108 atsinze Mugirimbabazi Jean Bosco bari bahanganye kuri uyu mwanya, nyuma y’uko uyu wa kabiri agize amajwi 20.

Nyuma yo gutorwa, Bwana Nzabonimana Guillaume Serge yavuze ko yishimiye intsinzi abonye kandi ngo afite imigambi yo kongera imbaraga mu ishyaka rya PL mu Ntara y’Iburasirazuba, by’umwihariko hongerwa umubare w’abayoboke b’iri shyaka ndetse no kubaka ubushobozi bwabo.

Nzabonimana yashimangiye ko ubu bushobozi bugomba kubakirwa mu bayoboke ba PL ngo bujyanye no kubamenyesha gahunda za Leta zose ziriho no kuzigiramo uruhare ndetse no kubaha ubushobozi bubafasha mu buzima barimo nk’imishinga ibateza imbere, kwirinda indwara z’ibyorezo no gukorana neza n’izindi nzego.

Mu izina rya komite nyobozi icyuye igihe, Kamanda Charles wari Perezida wa PL mu Ntara y’Iburasirazuba, yashimye abayoboke b’iri shyaka ku bw’ibikorwa byakozwe muri manda irangiye kuko babashije kongera abayoboke baryo, maze asaba na komite itowe kongera imbaraga mu kugwiza abayoboke b’ishyaka kuko ngo ubwinshi bw’abayoboke ni zo mbaraga z’ishyaka.

Depite Mukabera Henriette wari umushyitsi mukuru muri iki gikorwa akaba ari no muri komite nyobozi ya PL ku rwego rw’igihugu, yashimiye abatowe kandi abasaba gukorana ingufu nyinshi kugira ngo bagaragaze umusaruro uhagije mu mirimo binjiyemo.

Komite nyobozi ya PL mu rwego rw’Intara y’Iburasirazuba yatowe igizwe n’abantu 9 barimo perezida na ba visi perezida babiri, umunyamabanga, umucungamutungo, babiri bahagarariye abagore na babiri bahagarariye urubyiruko.

Komite nyobozi ya PL ku rwego rw’Intara y’Iburasirazuba iteye ku buryo bukurikira:

1. Nzabonimana Guillaume Serge - Perezida

2. Bagwaneza Theopista -Visi Perezida wa 1

3. Mugirimbabazi Jean Bosco - Visi Perezida wa 2

4. Nyirabazayire Angelique - Umunyamabanga

5. Kamanzi Jean Paul - Umubitsi

6. Kazarwa Gerturde - Uhagarariye Abagore

7. Muzarirehe Elisabeth - Uhagarariye Abagore

8. Umugwaneza Solange - Uhagarariye Urubyiruko

9. Sibobugingo Jean Bosco - Uhagarariye Urubyiruko

Aya matora yabaye nyuma ya Kongere y’Ishyaka PL ku rwego rw’Intara y’Iburasirazuba yari ihuje abagize komite nyobozi z’ishyaka rya PL ku rwego rwa buri karere ko mu Ntara y’Iburasirazuba ndetse n’umuntu umwe uhagarariye umurenge.

Emmanuel Ntivuguruzwa