Abantu 12 bishwe n’inkuba abandi barohama mu kiyaga cya Muhazi. Inkuba kandi ngo zahitanye inka 10 naho muri rusange amazu yangijwe n’imvura ivanze n’umuyaga ni 127 mu gihugu hose.

MIDIMAR yibukije abantu amabwiriza yabafasha kwirinda guhitanwa cyangwa kwangirizwa n’ibiza; isaba abatuye ahabateza ibyago kuhimuka, kuzirika ibisenge by’amazu no gutera ibiti bigabanya ubukana bw’umuyaga, kuyobora amazi y’umuvo no guca inzira z’aho agomba kumanukira, no gushyira imirindankuba ku mazu.

Buri wese kandi asabwa kwirinda imyitwarire yatuma akubitwa n’inkuba, irimo kugama munsi y’ibiti igihe hagwa imvura ivanze n’inkuba, kureka (gutega) amazi y’imvura afashe ibikoresho bikozwe mu byuma; gukoresha ibikoreshwa n’amashanyarazi mu gihe inkuba zikubita cyangwa imvura igwa, ndetse no kwirinda kwitaba telefone mu gihe inkuba zikubita.

Kubahiriza izi ngamba zo kwirinda ngo ni bimwe mu byafasha abantu kugabanya ingaruka ziterwa n’ibiza bimaze kugaragara muri iki gihe imvura y’itumba yatangiye, nk’uko MIDIMAR igaragaza ko ibikomeye cyane ari ibiterwa n’umuyaga, gutenguka kw’imisozi, imyuzure ndetse n’inkuba.

Iyi Minisiteri isaba ababyeyi kumenya aho abana baherereye mu gihe haguye imvura nyinshi, ndetse no kubabuza kujya ku migezi minini igihe imvura nyinshi ihise. Isaba kandi abaturage gutabarana ndetse no gutanga amakuru ku nzego z’ubuyobozi zibegereye, igihe bahaye ibiza n’igihe hari ikintu cyose gishobora kubiteza.

MIDIMAR yashyizeho umurongo utishyurwa ariwo 170 abantu bahamagaragaho mu gihe habaye ikiza cyangwa babonye icyabiteza; ndetse no gusoma andi makuru n’amabwiriza arushijeho ku rubuga rwayo rwa interineti.

Simon Kamuzinzi