Habuze gato ngo ibigega by’iyo sitasiyo bifatwe, bikaba byari guhita bikongeza inyubako z’ubucuruzi zihegereye, nk’uko ubuyobozi bwa Polisi mu mujyi wa Kigali bwabitangaje.

Iyo modoka yakoraga umurimo wo gutwara abantu mu muhanda Kigali-Musanze-Rubavu, yari iy’uwitwa Nsengiyumva Jean de Dieu, wayihasize kugirango bamurebere niba nta kibazo cya moteri yari ifite.

Umukanishi wari wayisigiwe witwa Gakwerere Jean, avuga ko habayeho ikosa ryo gukorera imirimo yo mu igaraji aho bavidurira, kuko nyir’imodoka yamusabye gukora muri moteri, asanze atari ho ikibazo kiri, yizanira umukanishi w’intsinga, ari nazo nyirabayazana wo gutwika imodoka.

Umuyobozi wa Polisi mu mujyi wa Kigali Chief. Supt. Rogers Rutikanga, yashimiye abaturage bihutiye gutabaza Polisi, kuko ngo iyo umuriro ufatisha ibigega bya lisansi, amazu ahegereye y’ubucuruzi nayo yari guhinduka umuyonga.

Nyiri sitasiyo na nyir’imodoka bose bavuga ko bari bafite ubwishingizi bw’ibikorwa byabo, ariko ngo biracyagoranye ko nyiri imodoka yishyurwa na sosiyete ya SORAS yari yarishinganyemo, nk’uko umukozi wayo Mporanyi Jean Baptiste yatangaje. Yagize ati: “Ese ubundi hariya ni mu igaraji?”.

Inkongi z’imiriro zirimo kwigaragaza hirya no hino mu mujyi wa Kigali, aho nyuma y’ukwezi utubari tubiri, iduka ry’imiti n’icyumba gicuruza ibyo kohererezanya amafaranga biri mu mujyi rwagati, byahiye hakarokoka ibikoresho bike cyane.

Simon Kamuzinzi