Agira ati “Turasaba Leta ko ijanisha ry’amafaranga ateganywa n’itegeko yagerwaho kuko nta na rimwe aya mafaranga aratangwa uko yateganyijwe mu itegeko”.

Dusingizemungu avuga amafaranga ateganywa n’itegeko aramutse agezweho byaba na ngombwa FARG ikongererwa izindi nkunga, nta kibazo abarokotse Jenoside bakongera guhura nacyo cyane cyane ku bijyanye no kubakirwa ndetse no gusanirwa amazu.

Ibi Dusingizemungu abivuze mu gihe hari abarakotse Jenoside yakorewe Abatutsi bakomeje kuvuga ko bafite imibereho mibi irimo kutagira aho baba kuko batarubakirwa.

Beata Mukangango, umukecuru utuye mu karere ka Ruhango umurenge wa Ruhango akagari ka Buhoro, ni umwe mu bacitse ku icumu rya Jenoside, avuga ko atagira aho aba kuko yemerewe kubakirwa ariko ngo nta n’ubu iyi nzu ye ntarayibona.

Verdiana Mukankundiye nawe atuye muri uyu murenge, avuga ko yubakiwe ariko inzu abamo ngo iyo imvura iguye ntabona aho aryama kubera ko inzu yubatswe nabi ndetse ngo akaba atanagira ubwiherero.

Kuri ibi bibazo byose, Dusingizemungu nibyo aheraho avuga ko ikigega cya FARG gikwiye kongererwa inkunga kugirango ibi bibazo abarokotse Jenoside yakorewe Abatutsi bagihura nabyo bishobore gukemurwa.

Eric Muvara