Dr. Ndikumana yatorewe kuba Perezida wa Njyanama y’Akarere ka Huye, nyuma y’igihe gitoya atorewe kuba umujyanama uhagarariye Umurenge wa Mbazi wo muri iyi nama njyanama y’Akarere ka Huye.

Yatowe rero nyuma y’indahiro yari amaze kugirira imbere y’abandi bajyanama ndetse n’izindi nzego z’ubuyobozi, harimo n’iz’ubutabera, ko azatunganya neza umurimo w’ubujyanama yatorewe n’abaturage bo mu Murenge wa Mbazi.

Ku bajyanama 22 bari bahari, Dr. Ndikumana yagize amajwi 17. Mugenzi we Nkurikiyinka Innocent usanzwe muri iyi nama na we wari umukandida kuri uyu mwanya we yagize amajwi 4. Habonetsemo n’ijwi rimwe ry’imfabusa.

Nyuma yo gutorwa, Dr. Ndikumana yavuze ko icyo azimiriza imbere ari ubufatanye n’abandi bajyanama, mu kurebera hamwe icyateza imbere Abanyehuye, bagendeye kuri gahunda z’igihugu.

Guverineri w’Intara y’Amajyepfo, Alphonse Munyatwari, yibukije abajyanama ko gufatanya ari ngombwa, kandi ko bagomba guharanira ko abo bahagarariye bajya mbere, bagashakisha imikorere mishya uko ibihe bisimburana, kuko ngo “n’ubwo aho abantu bayobora hatahinduka, abayoborwa bo bagenda bahinduka.”

Ubundi, Reverend Pasteur Dr. Ndikumana Viateur ni umuyobozi wungirije ushinzwe amasomo ku ishuri rikuru ry’abaporotesitanti rizwi ku izina rya PIASS, rikaba riherereye mu Karere ka Huye.

Uretse kuba ari umupasiteri mu itorero ry’Abangirikani mu Rwanda, ngo akandi kazi yakoze ni ak’ubwarimu ndetse no gukorera itorero abarizwamo nk’ushinzwe uburezi… amajyambere… Ngo yigeze no kuyobora ishuri rya CERAI. Mu bwicishe bugufi ati “ntabwo ndi igitangaza, nta bindi bindi nakoze rwose.”

Uwo asimbuye ni uwitwa Umuliisa B. Alphonse, Umuyobozi w’Ikigo cy’Ingoro z’Igihugu z’Umurage w’u Rwanda (INMR) weguye mu kwezi kwa Gicurasi, “ku bw’impamvu ze bwite”.

Marie Claire Joyeuse