Iyi gahunda yagenwe n’ikigo cy’igihugu cy’ibarurishamibare, yatangirijwe ku mugaragaro mu Karere ka Huye kuri uyu wa 15/7/2014, aho igomba kugeragerezwa harebwa ibigomba kunozwa, kuko ngo “aka karere gafite igice cy’umugi n’icy’icyaro” nk’uko bivugwa na Willy Gasafari, ushinzwe ishami ry’ibarura rusange mu kigo cy’igihugu cy’ibarurishamibare.

Abashinzwe irangamimerere mu mirenge ndetse n’abakora kwa muganga, bazajya buzuza amakuru ya ngombwa ku rubuga rwa interinet rwabigenewe. Imibare ituruka kwa muganga izajya ifasha abashinzwe irangamimerere kumenya ko hari ibyo bagomba kuzuza.

Abajyanama b’ubuzima ubundi bagira uruhare mu gutuma hamenyekana ababyariye mu rugo, na bo ngo hazarebwa ukuntu bajya bafasha muri iki gikorwa kuko kugeza uyu munsi hakigaragara abantu babyara cyangwa bapfusha ariko ntibabimenyeshe muri serivisi z’irangamimerere.

Kuri iyi ngingo kandi, ubuyobozi bw’Akarere ka Huye bwiyemeje gukora ubukangurambaga mu buryo bwose bushoboka kugira ngo abaturage bitabire kwandikisha abavutse ndetse no kwandukuza abapfuye.

Eugene Kayiranga Muzuka, umuyobozi w’akarere ka Huye ati “tuzacisha amatangazo ku maradiyo, mu nsengero, mu nama z’abaturage dukora buri kwezi ... kugira ngo abantu bamenye ko
irangamimerere ari igikorwa gikomeye gifitiye igihugu akamaro.”

Nta bazongera guhindura irangamimerere ryabo uko bishakiye

Willy Gasafari avuga ko igihe iyi gahunda izaba iri kugenda neza mu gihugu hose, izaca akajagari gakunze kugaragara mu irangamimerere aho usanga hari abantu bahindura amazina uko bishakiye, cyangwa se bakanahindura imyaka bafite.

Na none kandi, ngo izatuma imibare y’abanyagihugu imenyekana igihe cyose ikenewe, hatarinze gutegerezwa ibarura rusange riba mu gihe cy’imyaka 10, kandi na bwo rihenze.

Uyu muyobozi kandi agira ati “uko imyaka izagenda iza, irangamimerere nirizanoga –sinavuga ngo ni none cyangwa ejo- kubera ko ibarura rusange rihenda, hari igihe kizagera tukajya dukoresha iriya mibare y’irangamimerere.”

Irangamimerere rikoze mu buryo bw’ikoranabuhanga kandi ngo rizatuma umuturarwanda ahabwa serivisi zikenera irangamimerere aho ari ho hose, bidasabye ko ajya aho yiyandikishirije gusa.

Albert Niyonzima, ushinzwe irangamimerere mu Murenge wa Ngoma, ati “umuturage uzaba werekeye mu kandi gace azaba afite uburenganzira bwo kubona serivisi nk’aho ari iwabo, bityo mu gihugu cyose umuturage yumve ko ari iwabo.”

Marie Claire Joyeuse