Umwe mubari abakobwa wafashwe ku ngufu utarashatse ko amazina atangazwa aravuga ko umwana we usanga afite inyota yo kumenya uko yavutse.

Yagize ati “Nabuze ahantu muhera ngo mbimubwire kuko umutima wanjye nturabyakira kuko nabonaga akiri umwana numva ko byamuhungabanya. Ariko kuko ari mu mwaka wa gatandatu mu mashuri yisumbuye ndumva akuze ndashaka kuzamwicaza nkamubwira buri kintu cyose kuburyo bitazamugiraho ikibazo.

Uyu mubyeyi atangaza ko atazi niba umwana niba yarabimenye uburyo yavutsemo kuko atarabimubaza na rimwe.

Gusa bamwe mubagize ubutwari bwo kubwira abana babo amateka y’ibyababayeho bavuga ko bifasha umwana kubohoka ndetse bigatuma amenya amateka umubyeyi we yaciyemo, uyu ni umwe mubabwiye abana uko yavutse.

Ati “Yahoraga ambaza papa we kandi iwabo w’umuhungu wamfashe ku ngufu muri Jenoside turaturanye nabob agenda bigamba ko mbafitiye umwana, ibyo byampaye imbaraga maze umwana mbimubwira afite imyaka itandatu, ariko kubyakira byaramugoye kuko kugeza ubu biramugora.”

Avuga ko ni ubwo baturanye n’iwabo w’uwo muhungu nta ruhare na ruto bagira kugirango umwana abamenye kuko ntibashaka no kumwegera kubera ko bafite ipfunwe ry’ibyo umuhungu wabo yakoze.

Yaba bashiki be, nyina ise cyangwa n’abandi bavukana ntibashaka kwegera umwana. Gusa umuhungu niba yarapfuye cyangwa akiriho simbizi kuko muheruka anta munzu ahunga muri Jenoside.”

Imibare itangwa na minisiteri y’ubutegetsi bw’igihugu igaragaza ko abagore n’abakobwa bagera kubihumbi 250 bafashwe ku ngufu, muri abo abagera kuri 800 bibana mungo zabo, imiryango itegamiye kuri leta cyane ifasha abagore ikaba ifasha abana bagera kuri 816 bavutse ku bagore n’abakobwa bafashwe ku ngufu mugihe cya Jenoside yakorewe Abatutsi mu 1994.