Mu nama yagiranye n’ abayobozi b’inzego z’ibanze n’abavuga rikijyana muri ako karere, Uwamariya yababwiye ko hari ibwiriza rya Minisitiri w’Intebe risaba abayobozi ko bagomba gukemura ibibazo by’abaturage by’ibuze bitarenze iminsi itatu.

Uwamariya yagize ati “nimwegere abaturage mukemure ibibazo byabo kuko ibyo bizatuma mubasha kwesa imihigo maze mugakura akarere kanyu ku mwanya wa gatandatu kakaza imbere.”

Umuyobozi w’akarere ka Bugesera, Rwagaju Louis, yagejeje kuri guverineri w’intara ishusho y’akarere, anasobanura ko Bugesera isigaye ari ikigega cy’imyaka kandi mbere yararangwaga n’inzara bigatuma abaturage basuhuka.

Rwagaju yagize ati “imyumvire y’abaturage yarahindutse ubu abaturage basigaye bitabira guhinga no mu gihembwe A kandi bitarajyaga bibaho kubera gutinya kurumbya imyaka yabo.”

Umuyobozi w’intara y’Iburasirazuba yavuze ko ibibazo byinshi byabajijwe bijyanye n’iterambere ry’akarere nk’amashanyarazi n’imihanda idakozwe bigiye gushakirwa umuti habayeho ubufatanye n’inzego zose.

Guverineri yanasuye ibikorwa binyuranye by’iterambere biri muri ako karere.

Egide Kayiranga