Ibi abatuye Gisagara babitangaje kuwa mbere tariki ya 17/11/2014 ubwo bazindukiraga mu rugendo rwo kwamagana filimi ipfobya Jenoside yashyizwe ahagaragara na BBC, igikorwa cyakozwe mu mirenge inyuranye y’aka karere, kikitabirwa n’abaturage mu nzego zose.

Abatuye Akarere ka Gisagara bavuga ko kimwe n’abandi banyarwanda bababajwe nibyagaragajwe muri iriya Filimiyiswe “Rwanda’s Untold story” aho babibonamo gushaka gusubiza inyuma abanyarwanda bongera kubazanamo umwiryane kandi bari bageze ku rwego rwiza biyubaka.

Gasengayire Clémence uhagarariye inama y’igihugu y’abagore mu karere ka Gisagara, yavuze ko uru urugendo rwari rugamije kwamagana ibyatangajwe na BBC ariko na none rukanamagana uwo ariwe wese waba agifite umutima w’ingengabitekerezo igamije gutanya abanyarwanda.

Gasengayire avuga ko nta muntu n’umwe ufite uburengenzira bwo gusubiza abanyarwanda inyuma. Yanahumurije abarokotse jenoside kandi abibutsa ko Leta y’u Rwanda irebera buri munyarwanda wese, bityo badakwiye guterwa ubwoba n’abashaka gusibanganya amateka.

Ati “Uwaba agifite ingengabitekerezo wese no gushaka gutanya abanyarwanda icyo tumusaba ni ukuyivana cyangwa kuyigumana muri we ntagire umunyarwanda ayibibamo, abarokotse n’abandi bose bahungabanyijwe n’iriya filimi bo bahumure bakomere kuko Leta yacu yita kuri buri wese nta kizaduhungabanya nituba hamwe”.

Nzabandora Vincent umwe mu rubyiruko rwo mu murenge wa Ndora yagize ati “Mu gihe tumaze kumva gahunda ya “Ndi umunyarwanda” n’ubumwe ituganishaho, twababajwe no kubona hari abagipfobya Jenoside kandi twese tuzi ko yabayeho, nkaba mbona ari ugushaka kuturemamo umwiryane na none”.

Ngo si ugutandukanya abanyarwanda gusa rero kuko iyi filimi yanabaye nk’iyongera gukomeretsa abanyarwanda by’umwihariko abarokotse Jenoside nk’uko Nyiramajyambere Ancille utuye mu murenge wa Kansi abivuga.

Abaturage bo mu mirenge inyuranye yo mu karere ka Gisagara bakoze urugendo rwo kwamagana Filimi ipfobya Jenoside yerekanwe na BBC, baratangaza ko babifashijwemo na gahunda ya “Ndi Umunyarwanda” bazakomeza kwiyubakira igihugu kandi bakima icyuho uwo ariwe wese uzashaka kubasubiza inyuma no gusenya ibyo bagezeho.

Clarisse Umuhire