Ministiri Kabarebe ntahakana ko hari abaguye mu ntambara yo kubohora igihugu, ariko ngo nta muntu izo ngabo ziciye muri Kongo.

Yasobanuye ko Ingabo zari iza RPF-Inkotanyi zagabye urugamba rwo kubohora igihugu, zisanga abaturage barigishijwe kwanga Inkotanyi ku buryo, ingabo za ex-FAR zari iza Leta zajyaga kurwana zikitwaza abaturage ku rugamba.

Yagize ati: “Iyo bagabaga ibitero, ubwo n’abaturage barapfaga kuko babaga bazanye n’abasirikare. Nta muntu rero uhakana ko abantu batapfuye, kandi bazaga ari benshi cyane; nta ntambara itica abantu, uwabahakanira yababwira ko nta bantu bapfuye”.

Ubundi buryo ngo Abahutu bapfuyemo, nk’uko Ministiri Kabarebe abisobanura, ngo hari abasirikare bajyaga kureba ab’iwabo bagasanga barishwe, bagakurizamo kwihorera. Abo basirikare barahanwe, ndetse hanakorwa urutonde rwohererejwe urukiko mpuzamahanga rwashyiriweho u Rwanda, ruri i Arusha.

Yavuze ko hari n’abahutu bicwaga n’Interahamwe ndetse n’abari ingabo za FAR, kubera ko banze kujya kwifatanya nabo mu rugamba rwo kurwanya RPF.

Gen Kabarebe yasobanuye ko ibyavugiwe mu kiganiro “Imvo n’imvano” cyo ku wa gatandatu tariki 27/07/2013, ko ingabo z’u Rwanda zishe abaturage muri Congo Kinshasa nabyo atari byo; aho asobanura buri hantu hose bavuga ko impunzi z’Abahutu zaguye.

Mu baturage bahungiye muri Congo ngo harimo ibice bitatu; abatahutse Ingabo z’u Rwanda zimaze kwambuka muri Congo, abagumye mu mashyamba ya Masisi na Walikale ntibajye kure cyane, ndetse n’abakomeje kugenda kugeza ubwo bambutse icyari Zaire bagana muri Zambia, Angola, Congo Brazzaville na Centrafrica.

“Inkambi ya Mugunga nta kintu kibi na kimwe cyayibayeho, twararanye n’abaturage, tubyuka duhindukiza imitwe gusa tuberekeza mu Rwanda. Aho bavuga Tingitingi, twe twarwaniraga na FAR hakuno yaho, tugezeyo dusanga barahavuye ngo bageze za Baraka na Fizi, tugezeyo twumva ngo bageze Force Bendera, …twumva ngo bageze muri Zambia na Angola”, Gen. James Kabarebe.

Abagiye muri za Congo Brazaville na Centrafrica, nabo ngo bagendaga barenga Ingabo za RDF zihinguka aho bavuye, nk’uko Ministiri w’Ingabo abisobanura ko bitumvikana ukuntu bashinjwa kwica impunzi muri Congo, kandi nta muntu wari uhari wo kubabuza, mu gihe icyabajyanye ari ukubacyura.

Gen. James Kabarebe avuga ko hagiye gushyiraho uburyo bunoze bwo kubeshyuza amakuru ashinja Ingabo z’u Rwanda kwica Abanyarwanda mu Rwanda no muri Congo; “bitari ukujya ku ma radio gusa, nk’uko bisanzwe byumvikana mu bitangazamakuru mpuzamahanga”.

Simon Kamuzinzi