Ahagana saa munani z’ijoro ryo ku wa 03 Kanama 2015, ngo ni bwo umuzamu urinda kuri aka kagari yakanguwe n’ushinzwe umutekano, DASSO, amubwira ko ibendera ataribona. Uyu muzamu wari waharaye wenyine kuko ngo mugenzi we yari yarwaye atakoze yahise abimenyesha ubuyobozi.

Polisi ikorera mu Karere ka Nyagatare yahise ita muri yombi abantu bane bakekwa harimo uwo muzamu wari waharaye, uwo bagombaga kuhararana wari urwaye, umudasso wabyukije umuzamu amubwira ko ibendera ryibwe ndetse n’umuturage ngo wari wahageze mu masaha y’igicuku umunsi umwe mbere y’uko iryo bendera ryibwa.

Ubuyobozi n’abaturage bakaba bakomeje kurishakisha. Hakuzweyezu Emmanuel, Umunyamabanga Nshingwabikorwa w’Umurenge wa Gatunda, akeka ko ibikorwa nk’ibi byo kwiba ibirango by’igihugu bishobora kuba bikorwa n’abarembetsi batwara kanyanga. Kuri we, ngo kwiba ibendera ry’igihugu bigamije guca intege ubuyobozi.

Hakuzweyezu avuga ko bagiye kuganiriza abaturage kugira ngo bagire uruhare mu gukumira ibikorwa nk’ibi. Ikindi ngo bagiye gukaza amarondo kugira ngo abantu nk’aba bajye bafatwa.

Si ubwa ubwa mbere aka kagari kibwa ibendera kuko n’umwaka ushize ryibwe rikaburirwa irengero gusa abaturage baza kwishakamo ubushobozi bakusanya amafaranga yo kugura irindi.

SEBASAZA Gasana Emmanuel