Intandaro z’ayo makimbirane ari hagati y’umuyobozi w’akagali witwa Hategekimana Alexandre hamwe n’umucuruzi witwa Makuza Alexis ntizivugwaho rumwe n’impande zombi kuko buri wese ashinja undi kuba umunyamakosa.

Umuyobozi w’akagali avuga ko mugutangira, Makuza yubatse ikiraro cy’ingurube ze ku butaka bwa Leta kandi ku muhanda ahatemewe kubakwa maze yamubuza kubaka akamutera utwatsi ndetse akanakangurira abaturage n’abayobozi b’imidugudu kutumvira umuyobozi w’akagali.

Ibi ngo abikora yitwaje ijambo afite kubera imitungo ye, aho ngo abwira abaturage ko umuyobozi w’akagali ari umucancuro azajya ahandi naho we bagakomeza guturana.

Ikindi uyu mucuruzi ashinjwa ni uko atitabira gahunda za Leta nk’aho yanga gufatanya n’abandi bacuruzi gutanga umusanzu wo kurinda umutekano mu gasantere ka Rusumo, ndetse yacibwa n’amande akanga kuyatanga.

Gusa ubuyobozi bw’umurenge nabwo bukaba bugayirwa kudafatira ibyemezo uwo mucuruzi kuko Hategekimana avuga ko yabugejejeho icyo kibazo inshuro nyinshi mu magambo no mu nyandiko.

Rumwe mu nyandiko twabashije kubona rwanditswe n’umuyobozi w’akagali rusaba umurenge gukurikirana uwo mucuruzi n’abayobozi babiri b’imidugudu bavugwa ko baba bafatanyije nawe kuzambya ibintu, ariko akaba nta cyemezo kigeze gifatwa kuri icyo kibazo.

Ku ruhande rwa Makuza, avuga ko uwo muyobozi yatangiye amwaka ruswa ngo amureke yubakire ingurube ze, maze yayamwima agatangira kumurwanya.

Bamwe mu baturage twaganiriye harimo n’abayobozi b’imidugudu bemeza ko buri ruhande ruhangana n’urundi kandi buri wese akagerageza gushaka abantu babogamira ku ruhande rwe.

Ernest Kalinganire