Avuga ko ku bwe atazabasha gushobora kubarera wenyine niba nta bundi bufasha abonye.

Izi mpanga ni abakobwa babiri n’abahungu babiri, kugeza ubu urabona ubuzima bwazo bumeze neza.

Uyu mubyeyi ibi abitangaza mu gihe kugeza ubu akiri kwitabwaho n’ibitaro bikuru bya Kiziguro ari naho yabyariye abo bana. Avuga ko yibaza uko ubuzima bw’abana be buzamera mu gihe azaba asezerewe muri ibi bitaro.

Agira ati “Mfite ikibazo cy’amashereka macyeya kuko n’undi mwana aba bakurikiye ntiyabashaka kumuhaza, ubuyobozi bumfashije byibura bukampa inka ikamwa yajya inyunganira mu kubona amata yo kubahaza kuko abana bane ni benshi, ikindi kibazo mfite ni abantu bo kuzamfasha kubarera kuko mu rugo ni njye n’umugabo wanjye gusa.”

Umubyeyi Mukayigirwa n’impanga yibarutse enye.

Mfitumukiza Edison akuriye abaforomo mu bitaro bikuru bya Kiziguro, ari nawe ukurikirana ubuzima bw’aba bana na nyina umunsi ku wundi kuva bagera muri ibi bitaro, avuga ko ari ubwa mbere muri ibi bitaro habonetse umubyeyi ubyaye impanga enye.

Avuga ko ubusanzwe bakunze kwakira ababyara abana batatu cyangwa babiri, yongeraho kandi ko byibura rimwe mu kwezi muri ibi bitaro haboneka umubyeyi ubyara impanga z’abana batatu.

Ubuyobozi bw’Umurenge wa Murambi uyu mubyeyi atuyemo, buvuga ko bugiye kumukorera ubuvugizi kugira ngo abashe kubona ubufasha mu kurera abana be, ikindi kandi ngo buzakomeza kumuba hafi bukurikirana imikurire y’aba bana.

Uyu mubyeyi Mukayigirwa ngo ubu si ubwa mbere abyara abana b’impanga kuko hari izindi yagiye abyara ariko ntizibashe kubaho, ubu agize abana batanu mu mbyaro esheshatu. We n’umugabo we basanzwe ari abahinzi baciriritse.

Benjamin Nyandwi