Ibi byabaye tariki 18/ 3/ 201 mu ma saha ya saa cyenda ubwo hari inkubi y’umuyaga nyinshi n’imvura y’utujojoba. Abari kuri hoteli bumvise inkuba ikubise cyane ndetse babona n’ibishashi by’umuriro nyuma babona imwe mu nzu z’amacumbi ifashwe n’inkongi; nk’uko bitangazwa na nyiri hotel La Palisse, Mukezangabo Augustin.

Abakozi bahise biyambaza ibyuma bizimya umuriro byateganyijwe bahita bahazimya ariko igisenge, frigo, televiziyo, imeza na matelas byari mu byuma byarahiye.

Mukezangabo avuga ko mu gihe iyo mpanuka yabaga kuri hoteli hari abakiliya bagera kuri 200 ariko bose nta wahungabanyijwe nayo. Ibintu byangiritse bishobora kugera hafi ku mafaranga miliyoni 7 ariko ashobora no kurenga kubera igisenge cyahiye.

Impanuka y’inkuba ntabwi iri mu zo ubuyobozi bw’iyo hoteli bwari bwiteze kuko bafite ibyuma birinda inkuba. Kuba rero iyi yahakubise byafatwa nk’impanuka nk’izindi; nk’uko Mukezangabo yakomeje abisobanura.

Abajijwe niba nta mpungenge afite ko n’ahandi hazashya kubera ko zimwe mu nyubako za hoteli zisakaje ibyatsi mu buryo bw’umurimbo, Mukezangabo yasubije ko hari ibyuma byo kuzimya umuriro bihagije kandi ko Polisi y’igihugu ifatanyije na minisiteri yo kurwanya ibiza bahuguye abakozi ba hotel uburyo bwo kubikoresha ndetse no gukumira inkongi.

Hoteli La Palisse Gashora yubatse mu Karere ka Bugesera mu Murenge wa Gashora ikaba iri ku nkombe z’ikiyaga cya Rumira. Yatangiye gukora mu mwaka wa 2010.

Egide Kayiranga