Abaturage basanga ibiza byabaye mu Karere ka Gakenke bidasanzwe kuko nubwo inkangu zijya ziriduka, ngo ni ubwa mbere zihitanye abantu bangana uko.

Ubuyobozi bw’Akarere ka Gakenke buravuga ko abantu 34 ari bo bahitanwe n’inkangu zasenye amazu 460 yo mu mirenge itandukanye yo muri aka karere.

Abaturage 34 bahitanwe n’ibi biza ni abo mu mirenge ya Minazi, Muyongwe, Coko, Mugunga, Gakenke, Mataba, ariko Umurenge wa Gakenke ukaba ari wo wibasiwe cyane kuko mu bantu 34 bitabye Imana mu karere, 16 bose ni abo mu Murenge wa Gakenke.

Uretse amazu n’abantu bahaburiye ubuzima, hari n’abandi bantu 19 bakomerekejwe n’inkangu, bakaba bahise bajyanwa kwa muganga, hakiyongeraho amahegitari menshi y’imyaka hamwe n’imihanda yangiritse.

Muri iyo mihanda harimo uwa Kigali - Rubavu wiriwe ufunze kuko wari watengukiwemo n’inkangu, ihuza imirenge ya Rushashi na Gakenke hamwe n’undi uhuza umurenge wa Mugunga n’Akarere ka Muhanga na Musanze. Amateme arenga 40 na yo yaguye ndetse amwe mu matungo arimo inka, ingurube n’inkoko na byo byapfuye.

Umuhanda Kigali - Musanze wakozwe igice kimwe ariko uza kongera gufungwa kuko byagaragaye ko hakiri ubunyerere bushobora guteza impanuka.

Aganira na Kigali Today, Umuyobozi w’Akarere ka Gakenke Wungirije ushinzwe Imibereho Myiza, Uwimana Catherine, yatangaje ko baganiriye na Minisiteri Ishinzwe Imicungire y’Ibiza ku buryo hari ubufasha bw’ibanze bugomba kugezwa ku bangiririjwe.

Ati “Twakoze inama twumvikana na MIDMAR ko iri bwohereze isanduku zo gushyingura abo bantu. Ikindi twabasabye ni ubutabazi bw’ibanze nk’imyambaro, ibiryamirwa, ibyo kwiyorosa, ibyo gutekeramo, ibyo kuriramo, iby’isuku n’ibiribwa nk’ibishyimbo n’ibigori. Batubwiye ko saa moya za mugitondo baba bamaze kubizanira abo inzu zabo zasenyutse.”

Murekatete Marie Louise wo mu Murenge wa Gakenke, ni umwe mu basenyewe n’ibiza byateje inkangu, avuga ibiza bahuye na byo bidasanzwe kandi bikaba byabakuye umutima kuko ari bwo bwa mbere bahura n’ingorane nk’izi, aho ugutenguka kw’inkangu kwica abantu bangana gutyo umunsi umwe.

Ati “Nk’ubu mu Kagari ka Rusagara maze kumvamo abantu bageze muri 13 bamaze gupfa, umuntu ari gutereza amaso mu misozi akabona n’ibiti bya rutura byahurudutse nk’ishyamba rya hegitari ryamanutse ryose riri hasi mu gishanga, kandi ubundi hazaga ibitengu ariko ntibyatengukaga ngo biteze ikibazo kingana gutya.”

Kubera ko ubutaka bukirimo kunyerera, abaturage batuye munsi y’umusozi baragirwa inama yo kuba bahavuye kugeza igihe ubutaka buzakomerera kuko imvura iramutse iguye, bishobora kongera gutenguka.

Umuhanda Kigali - Musanze wari wiriwe ufunze, wamaze gukorwaho igice kimwe. Imodoka zongeye kubuzwa kugenda kuko byagaragaye ko hakinyerera bikaba bishobora guteza impanuka. Imibare y’abantu bahitanwe n’inkangu ikaba ishobora kwiyongera kuko harimo ababuriwe irengero bagishakishwa.

Uretse mu Karere ka Gakenke, ibiza byakomotse kuri iyo mvura y’ijoro rishyira ku Cyumweru, byahitanye abantu umunani bo mu Karere ka Muhanga ndetse n’abandi bane mu mu Karere ka Rubavu, babura ubuzima nyuma yo gutengukirwa n’inkangu.

Kanda HANO usome inkuru yabanje.

MENYA UMWANDITSI

Tarib Abdul

Umunyamakuru

@ lvRaheema

Reba inkuru zose nanditse ( 1222 )