Ubwo umuyobozi w’akarere yarangizaga kuganira n’abaturage tariki 04/02/2013, abaturage bazengurutse imodoka yagombaga gutwara umunyamakuru Uwimana bamusohora mu modoka ngo abasuhuze. Uwimana yubahirije ugushaka kw’abaturage, asohoka mu modoka asuhuza abakunzi be ahereye ruhande.

Kubera uburyo wabonaga bamwishimiye, wasangaga buri wese ashaka kumukoraho hitabazwa abashinzwe umutekano kugira ngo abashe kubasohokamo.

Uwimana Emmanuel asuhuza abakunzi be na bo bamugaragariza ko bamukunda. (Photo: N. Leonard)

Uyu munyamakuru umaze imyaka 9 mu mwuga w’itangazamakuru yamenyekanye kubera ikiganiro “Gahunda ni Porogaramu” cyakunzwe cyane n’abaturage batuye mu turere twumvikamo Radiyo y’Abaturage ya Musanze.

Abaturage baganiriye na Kigali Today batangaza ko bakunda umunyamakuru Uwimana kuko ikiganiro cye cyigisha kandi kikubaka imibanire y’abashakanye.

Ntuyehe Ignace, umusaza w’imyaka 80 ni umwe mu bashimishijwe no kubona Uwimana anagira amahirwe yo kuganira nawe agira ati: “ Imana irakarama, rwose Emmanuel ni umuntu dukunda; ni umuntu dukunda kuri Radiyo cyaneee. Avuga neza, arigisha umuntu akumva akanyurwa.”

Ngo icyo kiganiro gifasha abashakanye kubaka umubano hagati yabo n’ingo zari mu nzira yo gusenyuka zikongera zikabana neza.

Icyo kiganiro kinyura kuri Radiyo buri wa gatatu guhera saa kumi n’imwe za mugitondo kugeza saa kumi n’ebyiri gikangurira umugore cyangwa umugabo kuganira n’uwo bashakanye mu gitondo amwifuriza igitondo cyiza. Ngo ibyo biganiro bituma birirwana akanyamuneza n’imirimo bakora ikagenda neza.

Umusaza Ntuyehe Ignace akunda umunyamakuru Uwimana Emmanuel. (Photo: N. Leonard)

Uwimana yabisobanuye muri aya magambo: “iyo mwaramutse cyangwa iyo dialogue ni byo bituma haza umwuka mwiza mu muryango. Ikintu naboneye ni uko wa mwuka wabyukiye mu muryango ukomereza muri services uwo muryango utanga zitandukanye hirya no hino ni ukuvuga ko n’abava mu rugo yavuganye nabi n’uwo bashakanye atanga service nabi.”

Uyu munyamakuru akangurira abandi banyamakuru kwakira no kugisha neza abaturage igihe bagirana ibiganiro nabo kandi bagakora ibiganiro bigera ku muturage wo hasi.

Uretse icyo kiganiro, Uwimana anakora ikindi kiganiro cyitwa Urubuga rw’abana na cyo gikundwa n’abantu batari bake.

Abanyamakuru nk’imwe nk’abahanzi ni abantu bagira abakunzi kandi ni ibintu ibisanzwe kuko abantu babumva kuri Radiyo bagira amatsiko yo kubabona imbonenkubone. Ariko na none ntibisanzwe ko bakundwa cyane nk’abahanzi bihangange cyangwa abanyapolitiki nk’uko Uwimana abaturage bo mu Murenge wa Rusasa babimugaragarije.

Nshimiyimana Leonard