Umuvugizi wa Polisi y’u Rwanda, ACP Celestin Twahirwa, yabwiye Kigali Today ko Dr Mukankomeje akekwaho kuba yarabangamiye ikurikiranwa ry’abahoze ari abayobozi b’Akarere ka Rutsiro, bakurikiranweho inyerezwa ry’amafaranga yagombaga kubaka Guest House ya Rutsiro.

Dr Rose Mukankomeje yatawe muri yombi kuri iki Cyumweru, tariki 20 Werurwe 2016. Ifoto/Internet.

Yagize ati “Ni ko bimeze arafunze. Ntabwo ubu ngubu naguha ibisobanuro bihagije ku idosiye ye ariko arakekwaho kuba yarashatse gukingira ikibaba abakurikiranywe mu idosiye ya Rutsiro, ivuga ibintu bijyanye n’inyerezwa ry’umutungo ndetse na ruswa ku bijyanye no kubaka Guest House ya Rutsiro.”

Yongeyeho, ati “Iyo dosiye rero, bigaragara ko [Mukankomeje] ashobora kuba yarayigizemo uruhare mu buryo bwo gushaka kuzimanganya ibimenyetso no gukingira ikibaba abakurikiranwa kandi nk’umuyobozi ku rwego rwe ntabwo byakumvikana.”

Umuvugizi wa Polisi y’u Rwanda yavuze ko ubu iperereza ryatangiye, ibisobanuro birambuye bijyanye n’icyo akurikiranyweho bikazatangazwa iperereza rirangiye.

Dr Rose Mukankomeje yatawe muri yombi kuri iki Cyumweru tariki 20 Werurwe 2016, afungiye kuri Station ya Polisi ya Kicukiro mu Mujyi wa Kigali, nk’uko Polisi yabitangaje.