Aba bahejwe n’amateka bavuga ko ibi babyifuza kuko ngo Perezida Paul Kagame ariwe wabahaye ijambo mu bandi banyarwanda mu gihe bari barahejwe batagera aho abandi bari.

Nyirategejo Marcelline utuye mu Mudugudu wa Gasasa, Akagari ka Gasasa, Umurenge wa Cyahinda avuga ko Perezida Paul Kagame yahaye abahejwe inyuma n’amateka umwanya wo kugaragara mu bandi, ubu ngo bakaba basigaye bakaraba nabo bagacya kandi mbere ngo bitarabagaho.

Ati “Twebwe abahejwe n’amateka iyo twageraga nk’ahabaye ibirori twarihezaga, ariko ubu turajya mu bandi haba hari ibyo kunywa byateguwe tukabisangira n’abandi. Nta wahejwe n’amateka wambaraga igitenge cya wax, ariko uno munsi ndambara wax nkambara inkweto nanjye ngasirimuka, kandi nta wundi wabitugejejeho utari Paul Kagame”.

Nyirategejo avuga ko igihe iyi ngingo ya 101 y’itegeko nshinga yaba ihindutse biteguye guzatora Perezida Paul Kagame igihe cyose azaba agihumeka umwuka w’abazima.

Ati “Umubyeyi wacu Paul Kagame, ku bwanjye igihe azaba agihumeka umwuka w’abazima nzamutora akomeze atuyobore”.

Umuyobozi w’Akarere ka Nyaruguru, Habitegeko François avuga ko ari uburengenzira bw’abaturage gusaba ibyo bifuza, bityo ngo ibyifuzo by’abaturage ba Nyaruguru ku kuvugurura ingingo ya 101 y’itegeko nshinga nabyo bikazagezwa mu nzego zibishinzwe.

Ibi aba bahejwe inyuma n’amateka babitangaje mu gihe hirya no hino abanyarwanda bari gusaba inteko ishinga amategeko ko ingingo ya 101 y’itegeko nshinga yavugururwa, hamwe bakabinyuza mu nyandiko, cyangwa se abandi bagasaba ubuyobozi ko bwabibagereza ku babishinzwe.

Icyakora aba bahejwe n’amateka bo bavuga ko batekereje kwandika ariko bagahura n’imbogamizi z’uko abanshi muri bo batabizi, akaba ariyo mpamvu bahisemo gutuma abayobozi kubagereza ibyifuzo byabo ku nzego zibishinzwe.

Chales RUZINDANA