Aba baturage bavuga ko kurya izi mpu babanza kuzitunganya neza, bakazibabura ku muriro, bakazironga mu mazi inshuro zitari munsi y’eshatu, ubundi bakagereka ku bishyimbo.

Umwe mu bakiriya Kigali Today yasanze mu isoko rya Buhanda rirema buri wa Gatatu utarashatse gutangaza amazina ye, avuga ko uwariye uruhu rw’inka rugeretse ku bishyimbo atakwifuza kongera kurya inyama kubera ukuntu ruba ruryoshye.

Ati “abantu ntabwo bapfa kubyumva, ariko waruriye rutunganyije neza, nibwo umenya abaruriye icyo bakurusha. Kandi ikiza cyarwo ni uko nta ngaruka rugira ku buzima bw’umuntu nk’inyama zisanzwe”.

Uruhu rw’inka rugurwa n’abaturage bagamije kururya, nibura urugura make ni urw’amafaranga y’u Rwanda 300. Urugura arutwara rwarabanje kubaburwa akenshi ugasanga rwaranumye.

Abacuruza izi mpu bavuga ko bajya kuzirangura i Nyabugogo mu Mujyi Kigali kuko ngo muri aka gace inka zihabagirwa ziba ari nke ugereranyije n’abakiriya baba bazikeneye.

Kanani Gregoire, umwe mu bacuruza izi mpu mu isoko rya Buhanda, avuga ko amaze imyaka 3 muri ubu bucuruzi kandi ko abantu bitabira kuzigura ari benshi.

Ati “uretse no kuba ruryoha runahendukira abaturage ugereranyije n’uko yakaguze inyama. Kandi ugasanga n’ubundi vitamini zirimo zijya kungana”.

Uyu mucuruzi ahamya ko abakiriya babagana ari benshi cyane ndetse hakaba n’ubwo umubare w’abazikenera urenga ubushobozi bw’abacuruzi.

Kanani avuga ko mu gihe cy’imyaka 3 amaze acuruza izi mpu abaturage bateka ku bishyimbo zimaze ku mugeza kuri byinshi, kuko yashoboye kwigurira amatungo n’imirima, ndetse akaba anabasha kurihirira abana be amashuri. Avuga ko we na bagenzi be bifuza kwagura ubu bucuruzi bukanarenga imipaka y’u Rwanda.

Eric Muvara