Umwari Denise ni umunyamabanga nshingwabikorwa w’agateganyo w’akarere ka Bugesera aravuga ko rwiyemezamirimo yataye iyo nyubako imirimo yo kuyubaka igeze ku kigero cya 77%.

Agira ati “ Naho kwishyura bikaba byari bigeze ku kigero cya 74%. Ubu mu minsi mike iri imbere tuzahura na rwiyemezamirimo maze tubarane, niba hari ibyo atugomba abiduhe niba nawe hari ibyo tumugomba tubimuhe.”

Uyu munyamabanga nshingwabikorwa w’agateganyo w’akarere aravuga ko rwiyemezamirimo yagombaga kuba yarujuje inzu ku itariki ya 19/4/2015, iyo tariki ntiyayubahirije ndetse akarere kanamwongereyeho indi minsi ariko nabyo biramunanira.

“Ibyo turimo gukora byose turimo kubifashwamo n’ikigo cy’igihugu gishinzwe amasoko ya leta (RPPA) kuburyo nta ngaruka nimwe tubona bizagira ku karere.”

Inama njyanama y’akarere nayo yagejejweho iki kibazo dore ko bari barasabye ko harebwa uburyo haseswa isoko kugirango imirimo yo kubaka ikomeze, nk’uko bivugwa na perezida w’inama njyanama Kabera Pierre Claver.

Ati “Bidusigiye isomo ko natwe uwo tuzajya duha isoko tuzajya tumuhozaho ijisho dukurikiranira hafi ibyo akora, kandi tureba raporo niba zihura nibyo yakoje ndetse na komisiyo ya njyanama iifitanye isano n’iryo soko ikazajya irikurikiranira hafi.”

Inyubako y’akarere ka Bugesera izuzura itwaye amafaranga y’u Rwanda angana na miliyari 1na miliyoni 50 n’ ibihumbi 722 na 650, yavuye ku ngengo y’imari y’akarere. Kuri ubu abakozi batanu b’akarere ka Bugesera ndetse na rwiyemezamirimo barimo gukurikiranwa n’urukiko ku idindira ry’iyo nyubako.

Egide Kayiranga