Ku mugoroba wo kuri uyu wa 4 Gashyantare 2014, buri mwana yari afite kimwe mu biribwa bigizwe n’ibishyimbo, amashu, ibirayi, ibigori ndetse n’amafaranga aje gufasha bagenzi be birukanywe muri Tanzaniya.

Ibintu bitandukanye by’ibiribwa byazanywe, byabaye byinshi irarundwa bigenda bigabanwa imiryango igera kuri 27, igizwe n’abantu 99 birukanywe muri Tanzaniya.

Kamana Nicolas, umurezi ku kigo cy’amashuri abanza cya REGA II avuga ko babonye bagenzi babo baturutse Tanzaniya baje bababaye nabo bumva ni ikibazo, bituma bajya inama y’uko babatabara kuko gutabara ari umuco mwiza Abanyarwanda basanganywe.

Umusaza Rusezera Charles yashimiye cyane abana n’abarezi bagize ibigo by’amashuri abanza bya Bigogwe. Yavuze ko bageze mu Rwanda basanze Abanyarwanda ari abantu beza, bafite umutima mwiza,ku buryo kuva bahagera muri kuwa 17 Nzeri 2013,batigeze bicwa n’inzara.

Yongeraho ko kuva bazanywe guturwa mu karere ka Nyabihu mu murenge wa Bigogwe, bakomeje kubaho neza bakitwabwaho kandi bagafashwa n’abaturage.

Uyu musaza uvuga ko yavukiye muri Tanzaniya mu 1959 ngo yari afiteyo umufasha, abana 8 n’abuzukuru ariko iwo muryango we wose yawusizeyo. Ikimubabaza cyane ngo ni uburyo aba mu nzu wenyine ari umusaza, akivomera akitekera kandi yari afite abana be n’abuzukuru bakagombye kuba bamufasha.

Ikindi kibazo ngo bafite n’ik’imbeho yo mu bigogwe,ku buryo bakeneye ibyo kwiyorosa. Iki kikiyongeraho ikibazo cy’aho kuba,amazu yabo bwite,kuko kugeza ubu bakumbikiwe.

Kuri iki kibazo cy’aho kuba Mukaminani Angela, umuyobozi w’akarere ka Nyabihu ushinzwe iterambere ry’ubukungu n’imari, avuga ko cyatekerejweho kizanakemurwa kuko mu mazu 160 Croix Rouge irimo kubakira abatishoboye muri Bigogwe n’ayabo azaba arimo, bakaba baramaze no gutombora ibibaza nk’uko nabo ubwabo babidutangarije.

Angela kandi avuga ko bari kuvugana na MIDIMAR kugira ngo barebe uburyo bazababonera mitiweli bakabasha kwivuza.

Safari Viateur