Aba baturage bavuga ko indi mirimo yabo ipfa kuko kugera aho bavoma amazi bibafata ibirometero bisaga bibiri bajya kuyashaka mu wundi murenge wa Rwankuba bahana imbibi, kandi n’ayo babona bitaboroheye akaba atari meza.

Nyirangayaberura Floride, umuturage mu kagari ka Nyamiringa ati:”Ikibazo cy’amazi kiradukomereye cyane, n’ayo tubasha kubona ni mabi si meza na gato, nk’ubu muri iyi mvura bwo haranyerera kugerayo, kandi wanagerayo ukahasanga abantu benshi kuko tuhahurira turi abo mu Mirenge ibiri, Rwankuba na Gitesi.”

Mugarura Jean nawe utuye muri Nyabiringa ati:”Hariya hantu kujyayo ni iminota iri muri 45, urebye urugendo rwaho ni ibirometero bibiri, kandi n’ayo mazi yaho nayo si menshi yewe n’ubuzirnenge bwayo ntibwizewe kuko ni kano isanzwe, iyo ugezeyo uhamara nk’andi masaha atatu utegereje.”

Uwayezu Theodosie, Umunyamabanga Nshingwabikorwa w’Umurenge wa Gitesi, avuga ko kuba badafite amazi kandi meza, biterwa n’ubuhaname bwaho, ahandi amatiyo akaba yarazibye.

Ati:” VUP yadufashije gukora umuyoboro muri ako Kagari, ariko bigeze mu isantere ya Kivuruga basanga ngo isoko iri kure cyane ku buryo hasabwaga pompe kandi ngo irahenda cyane ku buryo batashoboye kuyagezayo, kimwe na Rwariro ariko ho ni ikibazo cy’imiyoboro yazibye.

Uyu Munyamabanga Nshingwabikorwa agira inama abatuye utu tugari dufite ikibazo cy’amazi meza ko mu gihe kitarakemuka, ayo bari kuvoma mu Murenge baturanye wa Rwankuba bajya babanza kuyateka mu rwego rwo kwirinda indwara.

Uburebure bw’imisozi igararara mu Murenge wa Gitesi ndetse n’uwo baturanye wa Rwankuba, ni imwe mu mpamvu nyamukuru z’ibura ry’amazi ku bayituye, aho usanga n’aho aboneka ari atemba mu mibande.

Ernest NDAYISABA