Gutandukana kwa Mwanawumuntu n’umugore we witwa Niyonsaba Donatira ngo byatewe nuko yamutereranye mu gihe cy’akaga bari barimo mu buhungiro mu gihugu cya Congo akamusigana abana 3 kandi ngo yaraye abyaye.

Nyuma y’igihe gito, haje umugabo asanga Niyonsaba aho ari n’umwana w’uruhinja aramwondora ari nako guhita bakundana barashakana. Kugeza ubu ngo babyaranye abana 2 basanga batatu ba Mwanawumuntu.

Mwanawumuntu avuga ko ngo nta kintu kibi cyangwa intonganya byigeze bibaho hagati ye n’umugore we cyatuma batandukana kuko kuva bashakanye ngo bari babanye neza kandi bose ari abarokore basenga Imana.

Gusa ngo icyatumye uyu mugore amuhinduka nuko ngo yamusize mu buhungiro agatahuka mu Rwanda bitewe nuko ngo bari batewe n’intambara aho bari bari mu nkambi hanyuma buri wese akiruka ajya ukwe.

Mwanawumuntu yahatutse mu Rwanda umugore we asigara muri Congo ashakirayo undi mugabo.

Mwanawumuntu we ngo yaje gushiduka ageze mu Rwanda ariko ngo ntabwo yari agambiriye gusiga umugore we n’abana be kuko ngo yabakundaga.

Nyuma yaho ngo yaje kumva amakuru ko yashatse undi mugabo ariko ngo ntibyamubujije kumutumaho buri munsi aho yamushishikarizaga gutahuka kugeza aho ngo yigereye kuri HCR akamwoherereza amafoto ye amubwira ko mu Rwanda ameze neza kandi yifuza ko nawe yatahuka.

Ubwo uyu mugobo yamenyaga ko umugore we yatahutse ngo yahise aza kumwakira ariko ahageze atungurwa nuko amuteye utwatsi avuga ko yifuza kujya kuri uwo mugabo wamushakiye mu nkambi ukomoka mu karere ka Rusizi mu murenge wa Mururu.

Ubwo abayobozi batandukanye bageragezaga gukemura iki kibazo byakomeje kubabera ingorabahizi aho bavuga ko kitoroshye na gato.

Abayobozi b’inkambi y’agateganyo ya Nyagatare iri mu karere ka Rusizi barimo Munyemana Anasithasi bavuga ko bari bagerageje gukemura iki kibazo mu buryo bw’agateganyo aho bari basabye Mwanawumuntu kuba ajyanye abana be batatu ibindi bikazakemurwa hakurikijwe amategeko ariko nabyo ntibyakunda kubera ko umwana umwe yanze gutandukana na nyina.

Mwanawumuntu avuga ko mu gihe cyose umugore we yakwemera kumugarukaho akamukunda kabone nubwo ngo nawe yamuhemukiye akajya kubyarana n’undi mugabo ngo yamwakira neza cyane dore ko ngo yari yaje kumwakira azi ko amutahana aho ngo yari yasize mu rugo bari gutegura ibirori byo kumwakira.

Mwanawumuntu avuga ko atishimiye kuba umupfakazi kandi umugo we basezeranye agihari, gusa nanone uyu mugore ngo yagiye gushaka umugabo wa kabiri atazi ko umugabo we wa mbere akiriho kuko ngo bari bazi ko yaguye mu ntambara zo muri Congo.

Kugeza ubu Niyonsaba Donatira yajyanye n’umugabo we wa 2 mu murenge wa Mururu n’abana bose ariko Mwanawumuntu ajyana nabo kureba aho bagiye gutura kugirango mu gihe azifuza kujya kuburana mu mategeko azamenye aho abariza umuryango we.

Musabwa Euphrem