Yabitangaje kuri uyu wa 24 Nzeri 2015 mu nama yo mu rwego rwo hejuru y’Umuryango w’Abibumbye yiga ku burenganzira bw’umwana n’intego z’iterambere rirambye.

Mme Jeannette Kagame mu nama ya Loni ivuga ku burunganzira bw’umwana.

Madamu Jeannette Kagame ageza ijambo rye ku banyacyubahiro batandukanye, abikorera, abarimu ba za kaminuza yavuze ko amateka mabi ya Jenoside u Rwanda rwanyuzemo agasiga imbaga nini y’abana b’imfubyi atera imbaraga zidasanzwe Abanyarwanda gukora cyane kugira ngo babeho neza.

Yagize ati “Ubumuntu bwacu bugaragazwa n’uburyo dufata abantu b’imbaraga nke mu miryango yacu. Amateka ni yo azaba umucamanza utabera w’ibyo tuzananirwa gukora. Kunyura mu bintu bibi no kubona abantu basembwa bituma twiyemeza kubirenga no gufata neza abo bana.”

Madame Jeannette Kagame, ahereye ku ngero z’abana babiri, Paci w’imyaka itandatu wareze abavandimwe be na Jean Marie wafashijwe kubona icyo kurya n’aho gukinga umusaya none uyu munsi na we akaba afasha abana b’abakobwa b’imfubyi kubona amacumbi, ashimangira ko bagomba gushakira igisubizo ibibazo by’abana babaye.

Jeannette Kagame yabasobanuriye kandi ko ibibazo abana b’u Rwanda banyuzemo bituma u Rwanda rwita by’umwihariko ku burenganzira bw’umwana.

Umuhungu umwe muri bane bari munsi y’imyaka 15 yahuye n’ihohoterwa rikorerwa umubiri na ho umukobwa umwe mu bakobwa 10 ku isi yakorewe ihohoterwa rishingiye ku gitsina, kandi ngo bikorwa n’abantu batari abakure.

Ngo iyo shusho ikwiye kubakangura bakabona ubukana bw’ikibazo cy’ihohoterwa rikorerwa abana.

Ku ruhande rw’u Rwanda, ahamya ko hari byinshi byakozwe mu rwego rwo kwita ku burengazira bw’umwana n’umutekano we birimo gushyiraho amategeko akumira kandi ahana ihohoterwa rikorerwa abana, Komisiyo y’Igihugu ishinzwe Uburenganzira bw’Abana, Isange One Stop Center ndetse n’umuryango Imbuto Foundation, bose baharanira ko umwana agira ubuzima bwiza.

Mu bindi byakozwe; nk’uko akomeza abivuga, hari abana babaga mu bigo by’imfubyi, 1/3 cyabo basubijwe mu miryango, abana ibihumbi bitatu babaga mu mihanda bigishijwe imyuga na bo ubu barererwa mu miryango.

Madame Jeannette Kagame ashimangira ko bafite inshingano zo gukora iyo bwabaga kugira ngo barandure ihohoterwa rikorerwa abana ku isi.

Abari muri iyo nama banyuzwe n’ibyo Jeannette Kagame yababwiye k’uko u Rwanda rwubahiriza uburenganzira bw’umwana.

Yunzemo ati “Nk’abagize isi yabaye umudugudu ni inshingano zacu kugera ku ntego y’iterambere rirambye, yo kurandura ihohoterwa, ikoreshwa ry’abana imirimo ivunanye, icuruzwa ryabo n’ubundi bwoko bwose bw’ihohoterwa n’iyicaruboza rikorerwa abana.”

Iyi nama yo mu rwego rwo hejuru yitabiriwe n’ abanyacyubahiro barimo umwamikazi wa Swede, umuyobozi wa UNESCO, Graca Machel wahoze ari umugore Perezida wa Mozambique, ifite insanganyamatsiko igira iti “Abana n’Intego z’Iterambere rirambye: guha amahirwe umwana wese”.

Yateguwe n’abahagarariye igihugu cya Swede muri UN, Umuryango wo muri Leta Zunze Ubumwe z’Amerika “World Childhood Foundation” bafatanyije n’undi witwa Mentor International.

NSHIMIYIMANA Leonard