Mushinzimana Jean de Capistra, ushinzwe guhuza ibikorwa bya REG mu Ntara y’Amajyepfo, avuga ko hamaze gukorwa igenamigambi ry’uko gutanga amashaynyrazi, ku rwego rw’uturere kugira ngo ibyateganyijwe bigirwemo uruhare n’inzego zitandukanye.

Avuga ko hari amashanyarazi azatangwa ku bufatanye n’uturere twose tw’Intara y’Amajyepfo, kandi ko hamaze kugaragazwa uko bizashyirwa mu bikorwa, dore ko kuva mu mwaka wa 2012 amashanyarazi yavuye kuri 11% akaba ageze kuri 70%.

Avuga ko porogaramu nshya ya REG yo gutanga amashanyarazi mu Ntara y’Amajyepfo, izayageza ku bafatabuguzi basaga ibihumbi 104, hakurikijwe uko uturere twagenewe amashanyarazi.

Iyo porogaramu yo gutanga amashanyarazi iteganya ko nibura izatwara asaga miliyari hafi 70Frw, kandi uturere natwo tukaba dukomeje gushyiramo imbaraga ngo abaturage babone amashanyarazi.

Mushinzimana avuga ko kugeza ubu mu Ntara y’Amajyepfo henshi hari imiyoboro minini y’amashanyarazi, ubu hakaba hagiye gukorwa imiyoboro mito yegereye abaturage, no kubashyirira amashanyarazi ku nzu.

Muri iyo gahunda kandi ngo hazabaho gukorana na ba rwiyemezamirimo bakora ibijyanye no gutanga amashanyarazi akomoka ku mirasire y’izuba, bakazunganira REG kugira ngo begereza abaturage imirasire ku buryo butabahenze cyane.

Mushinzimana avuga ko akurikije porogaramu nshya ya REG yo kugeza amashanyarazi ku baturage, nta gushidikanya ko gahunda ya Perezida wa Repubulika, Paul Kagame, kuri iyo ngingo, bitarenze umwaka wa 2022 izagerwaho.