Iki gikombe cy’ishimwe gitangwa n’Ihuriro ry’Ibigo bishinzwe gutanga Amasoko muri EAC cyageze mu Karere ka Nyanza ku gicamunsi cyo kuri uyu wa 01Mata 2015 cyizanywe n’Umuyobozi w’akarere ka Nyanza, Murenzi Abdallah, wari hamwe na bamwe mu bakozi bakorana bakivanye mu Mujyi wa Kigali.

Abakozi banyuranye b’Akarere ka Nyanza bari mu byishimo ubwo bamurikirwaga iki gikombe bahawe mu rwego rw’akarere u Rwanda ruherereyemo by’umwihariko akaba ari na bo bacyegukanye bacyambuye utundi turere tw’igihugu.

Umuryango utanga iki gikombe muri ibi bihugu bigize umuryango w’Afurika y’Uburasirazuba ukigenera inzego ebyiri z’ubuyobozi mu gihugu maze kigahabwa urwego ruhagarariye guverinema (Central Government) n’urwego rw’ibanze ( Local government).

Muri uyu mwaka wa 2015 cyahawe ubuyobozi bw’Intara y’amajyepfo bwari buhagarariye Guverinema y’u Rwanda ndetse n’Akarere ka Nyanza kari gahagarariye uturere mu inzego z’ibanze mu gihugu.

Umunyamabanga Nshingwabikorwa w’Akarere ka Nyanza, Kayijuka John, avuga ko guhabwa iki gihembo byarushijeho kubaha imbaraga zo gukora cyane birinda amanyanga mu mitangire y’amasoko.

Yagize ati “ Ni ibintu bishimishije kuba twegukanye igihembo nk’iki kiri ku rwego ruhanitse rw’umuryango w’ibihugu bigize EAC, tugiye kongera imbaraga dutware n’ibindi bihembo bishimangira gukorera mu mucyo nko mu itangwa ry’amasoko”.

Bwana Kayijuka John yakomeje ashimira abakozi bakorana mu karere ka Nyanza avuga ko uruhare rwabo mu mikorere myiza inoze aribyo byatumye begukana igihembo.

Akarere ka Nyanza gahawe iki gihembo mu gihe mu mpera z’umwaka ushize wa 2014 kanezwe bikomeye na komisiyo ishinzwe imicungire y’imari n’umutungo bya Leta bitewe n’amakosa yagaragaye mu myandikire y’ibitabo by’ibaruramari ariko ubungo nayo yarakosowe nk’uko uyu muyobozi ushinzwe ingengo y’amari ya Leta muri aka karere abivuga.

Jean Pierre Twizeyeyezu