Urwo rwibutso ruzaba rugizwe n’ibice bitatu by’ingenzi birimo kubaka imva itwikiriye, uruzitiro no kubaka inzu izakoreshwa mu kubika ibimenyetso by’amateka agaragaza Jenoside yakorewe Abatutsi muri Mata 1994 mu Rwanda ariko by’umwihariko mu karere ka Nyanza.

Imyubakire y’uru rwibutso ijyanye na gahunda yo gushyira mu bikorwa imwe mu mihigo akarere ka Nyanza kiyemeje kuzashyira mu bikorwa.

Mu mihigo ya 2012-2013 hagomba kuzacukurwa imva ndetse n’indi mirimo y’ubwubatsi igakomerezaho; nk’uko Ange Gahigyi Claude ushinzwe urubyiruko n’umuco ku rwego rw’akarere ka Nyanza abitangaza.

Hanashyizweho konti yo kunyuzaho inkunga yo kubaka urwo rwibutso kuri buri wese wumva ko yagira uruhare mu myubakire yarwo. Iyo nkonti yitwa URWIBUTSO RWA JENOSIDE/NYANZA DISTRICT No 00086-0423840-13 ikaba iherereye muri Banki ya Kigali.

Abafatanyabikorwa batandukanye bakorera mu karere ka Nyanza nabo bari bayitumiwemo bagaragaje ko biteguye gushyigikira iki gikorwa cyo kubaka urwibutso bagitera inkunga y’uburyo bw’ibitekerezo n’amafaranga kugira ngo hazubakwe urwibutso rugaragaza neza amateka ya Jenoside.

Uru rwibutso rwa Jenoside rw’akarere ka Nyanza ruzubakwa mu murenge wa Busasamana muri ako karere.

Jean Pierre Twizeyeyezu