Kalisa niryo zina uyu Kabera yakoreshaga mu kwaka amafaranga abacuruzi batishyuye imisoro, nk’uko umuyobozi w’ishami rya Polisi rushinzwe kurwanya magendu (RPD), Chief Supt. Emmanuel Kalinda, yabitangarije abanyamakuru kuri uyu wa Mbere tariki 2/6/2014.

Yagize ati “Twari tumaze ibyumweru nka bibiri tumushakisha twaramubuze kuko amakuru twari twayahawe n’abantu ndetse harimo n’abacuruzi aho yagiye yiyita uwitwa Kalisa. Dufite Sergent witwa Kalisa ukorera hano, agakomeza yiyita ko ari Kalisa kugira ngo atere abo bacuruzi ubwoba abone uko abambura amafaranga.”

ICP Kalinda yatangaje Kabera wigeze no kuba mu batanga amakuru ya magendu ariko nyuma akaza kuvanwamo, yabwiraga abacuruzi batubahirije ibijyanye n’imisoro n’amahoro ko azabatanga bagafungwa, aho kugeza ubu yari amaze kubaka amafaranga agera ku bihumbi 400.

Gusa uyu Kabera we yabihakanye avuga ko arengana kuko igihe yamaze atanga amakuru byatumye amenyekana akazi akora, bityo akaba nta kuntu yari kongera gutunguka aba imbere y’aba bacuruzi abaka amafaranga.

Ati “Ibyo bandega ntabyo nzi. Nigeze kujya mbaha amakuru kuva uru rwego rukitwa Anti Smuggling kugeza rubaye RPD. Ariko sinigeze niyita umukozi wabo kuko njye sinagaragaraga kuko nta n’ibyangombwa byabo ngira kandi mu mujyi abantu bose baranzi ntibyakunda.”

N’ubwo avuga ibi, umuyobozi w’uru rwego agaragaza inshuro zigera kuri eshatu Kabera yagiye afungwa azira kwaka ruswa kandi nawe akabyiyemerera ariko akavuga ko yarenganaga.

Chief Supt. Kalinda asaba abacuruzi kuba maso bakirinda buri wese uza abaka amakuru ku bucuruzi cyangwa yiyita umukozi w’uru rwego cyangwa uwa RRA. Icyaha cyo kwiyitirira imirimo ya leta gihanishwa igifungo kiva ku mwaka umwe kugera kuri itatu, n’ihazabu y’amafaranga y’u Rwanda kuva ku bihumbi 50 kugeza ku bihumbi 500.

Emmanuel N. Hitimana