Umwe mubayobozi b’ikinyamakuru gikorera i Goma yatangaje ko bishimiye imikorere ya M23 kuko ivugurura serivise kandi ntawe ihutaje.

Yagize ati “twishimiye gukorana na M23 nubwo twayibwiwe nabi siko biri, barashaka kuganira n’inzego zose, ikindi nuko bari kumva ibibazo inzego zifite kugira ngo bicyemuke, turabishimiye cyane.”

Kigali Today imubajije uko babyakira M23 isabwe kuva aho yafashe yasubije atya: “M23 kuva aho yafashe ni urupfu kuri twe, kuko yamaze kutugaragariza imikorere myiza itandukanye n’iya Leta ya Kinshasa, ikindi nuko ingabo za Leta zagaragaje gutsindwa zatwihimuraho, ntabyo twifuza kandi nayo izabyumve ntibyubahirize.”

Abaturage batuye mu mujyi wa Goma bavuga ko nubwo M23 ariyo igirana imishyikirano n’umuryango w’akarere k’ibiyaga bigari ICGRL ngo n’abaturage bafite ijambo kugaragaza icyo bifuza mu kurengera umutekano wabo.

Bamwe mu banyamakuru bakorera mu mujyi wa Goma bari mu nama n’ubuyobozi bwa M23.

Uwitwa Karimu utuye i Goma yifuza ko mbere y’uko M23 ifata umwanzuro wo kuva i Goma yabanza ikabagisha inama ngo kuko bayisabye gusubira Ructhuro yaba itereranye abaturage.

Yagize ati “twagize amahirwe yo gukira ingabo za leta zatwamburaga none ngo zigaruke? Ubu turakora amasaha yose kandi umutekano ni wose, ntawatoborewe iduka cyangwa ngo yamburwe twifuza kuguma muri ubu buzima”.

Nubwo umujyi wa Goma wafashwe na M23, serivise zariho nizo ziri gukora ndetse n’ibirango bya Leta nibyo bikoresha nk’uko bamwe mu bakozi basubijwe mu mirimo, ndetse amashuri yose kugera kuri Kaminuza akorera mu mujyi wa Goma yahamagariwe gukomeza imirimo.

Abapolisi n’abahoze ari ingabo za FARDC bifatanyije n’ingabo za M23 bajyanywe mu mahugurwa mbere yo gusubira mu kazi.

Mugunga: Abari barahunze barasaba HCR kubasubiza mu byabo

Abanyekongo bavuye mu byabo kubera imirwano yahuje ingabo za leta ya Congo n’ingabo z’umutwe wa M23 bahungiye Mugunga barasaba ishami ry’umuryango wa bibumbye kubafasha gusubira mu byabo kuko bamaze kwizera umutekano waho bari batuye.

Bamwe mu ngabo n’abapolisi bakoreraga Leta bagiye gukorana na M23.

Impunzi zigera ku bihumbi 30 zavuye ahitwa Kanyaruchinya zikambitse mu nkambi ya Mugunga zivuga ko zimaze kubona ko ingabo za M23 zicunze umutekano neza ahafashwe, akaba nta mpamvu yo kuguma mu buhungiro abana bicwa n’inzara.

Evariste Kabunga, umwe mu mpunzi yatangarije Radio Okapi ko barambiwe kuba mu nkambi, bacyeneye guhinga imirima yabo, akavuga ko ishami ry’umuryango wabibumbye ritakomeza kubagumana ahubwo ryabafasha kwisubirira mu miryango yabo.

Ubuyobozi bw’umuryango wa HCR bwo bukomeje kugaragaza imbogamizi z’ubushobozi bwo gusubiza impunzi mu byazo ariko ngo bagiye kugerageza gushakira abababaye ibyo kurya; nk’uko byatangajwe na Kouassi Lazard Etienne.

Sylidio Sebuharara