KT TV
Abatahutse 5000 bagiye gufashwa gusubira mu buzima busanzwe
Abanyarwanda 5000 bo mu turere icumi batahutse bavuye mu buhungiro bagiye guterwa inkunga ibafasha gusubira mu buzima busanzwe binyuze mu mushinga wa Minisiteri y’Imicungire y’Ibiza n’Impunzi (MIDIMAR) n’Umuryango Mpuzamahanga Ushinzwe abimukira (IOM).
Binyujiwe muri uyu mushinga unafasha abandi Banyarwanda batishoboye, abatahutse bazafashwa kubona amacumbi, amatungo ndetse abakiri urubyiruko bigishwe imyuga, bazahabwe n’ibikoresho bijyanye n’imyuga bize kugira ngo bihangire imirimo.
Kuri uyu wa mbere tariki 6 Gicurasi 2013, nibwo Minisitiri ushinzwe gucyura impunzi Mukantabana Seraphine yatangije ku mugaragaro icyiciro cya kane cy’Umushinga wo gusubiza mu buzima busanzwe abatahutse kizakoresha amafaranga miliyoni 3 z’amadolari y’Amerika.
Uyu mushinga uzakorera mu gihe cy’umwaka mu turere 10, harimo Karongi, Rutsiro, Nyabihu, Rubavu na Nyamasheke mu Ntara y’Uburengerazuba, Gisagara, Huye, Nyamagabe na Nyaruguru mu Ntara y’Amajyepfo n’akarere ka Musanze mu Ntara y’amajyaruguru.
Ministiri Mukantabana yatangaje ko Guverinoma y’u Rwanda iri gushyira ingufu mu bikorwa byo gusubiza abatahuka mu buzima busanzwe, kuko icyemezo cy’ikurwaho ry’ubuhunzi rusange ku Banyarwanda cyegereje, biryo hakaba hashobora gutahuka Abanyarwanda benshi.
Minisitiri yagize ati “si uyu mushinga wonyine twateganije. Hari n’undi mushinga munini MIDIMAR ihuriyeho n’Amashami y’Umuryango w’Abibumbye akorera mu Rwanda, uzafasha abatahuka mu buryo butandukanye. Muri uwo mushinga wo, harimo ibyo kwishyura ubwisungane mu kwivuza, kwishyurira abana amashuri ndetse no gukurikira ibibazo bijyanye n’ubutabera abatahuka bashobora guhura nabyo.”
Umushinga wo gusubiza mu buzima busanzwe abahahutse no gufasha abandi baturage batishoboye watangiye gushyirwa mu bikorwa na MIDIMAR ifatanije n’Umuryango mpuzamahanga w’Abimukira IOM mu mwaka wa 2010, uterwa inkunga na Leta y’Ubuyapani.
Mu cyiciro cya mbere muri 2010, uyu mushinga wakoreye mu turere twose tugize intara y’Uburengerazuba no mu turere dutatu mu ntara y’Amajyepfo aritwo Gisagara, Nyaruguru na Nymagabe.
Mu cyiciro cya kabiri muri 2011,uyu mushinga wakoreye mu turere dutanu tw’intara y’Uburasirazuba aritwo Nyagatare, Gatsibo, Kayonza, Kirehe na Bugesera.
Mu cyiro cya gatatu mu mwaka wa 2012, uyu mushinga wakoreye mu turere tune tw’intara y’Amajyaruguru aritwo Rulindo, Burera, Gicumbi na Musanze no mu turere dutatu tw’Intara y’Uburasirazuba : Bugesera, Rwamagana na Ngoma.
Abagenerwabikorwa bagera ku 40,000 nibo bamaze gufashwa n’uwo mushinga kuva watangira.
Emmanuel N. Hitimana
Ibitekerezo ( 4 )
Ohereza igitekerezo
|
|
Iyi nkunga ije ikenewe kandi , abayihabwa bagakwiye kumenya ubufasha bahawe kandi bakazabikorera abandi..
Abahunze bazaze bazafashwa uko bishoboka kose,kandi ntibazahera ku busa kuko basize imitungo yabo bazagaruka bayisange ibatunge.
nta kiza cy’ubuhunzi,uko wabaho kose uri iwanyu,biratinda ugatera imbere,niba rero leta iteganya ubufasha ku bazataha,bizaborohera gusubira mu buzima busanzwe.
Abanyarwanda twese dufite ubushake bwo gufatanya tukakira abazatahuka bose,kandi ingero ni nyinshi z’abatahutse ntacyo bafite none ubu bakaba bameze neza batunze batunganiwe,n’abandi bazaza rero nta kibazo bakwiye kugira.