Umukuru w’Igihugu yatangaje ibi mu ijambo ryo gutangiza kwibuka ku nshuro ya 22, aho yaje no kubisubiramo mu kiganiro yahise agirana n’abanyamakuru ku mugoroba wo kuri uyu wa Gatandatu tariki 9 Mata 2016.

Perezida Kagame yavuze ko umutekano w’Abanyarwanda urinzwe kandi ko uwagerageza gutera u Rwanda yagira ingorane.

Yagize ati ”Njya numva mu baturanyi ngo hari abaribwaribwa ngo bashaka gufasha interahamwe gutera u Rwanda. Uwampa ngo babigire vuba, rwose ndaribwaribwa; ariko bamwe barabizi ko bitazabahira, ngira ngo ni na cyo kibatinza. Gusa uwampa ngo babigerageze”.

Perezida Kagame avuga ko bitashoboka ko abashaka guhungabanya umutekano w’Abanyarwanda babigeraho, gusa ngo icyo bagerageza ni ugusenya ubumwe bw’Abanyarwanda.

Ati ”Ariko wenda bazagera rimwe baduhe uburyo tubereke icyo tuvuga; nibagire baduhe uburyo -tubone aho duhera; uwagerageza guhungabanya ibyo tumaze kubaka mu myaka 22 ishize; abo mwumva bizengurutsa imipaka mu bihugu by’abaturanyi cyangwa bagira gute, biratinze ngo bakore ibyo bifuza gukora, ntabwo bamenya icyabakubise”.

Perezida Kagame yakomeje yizeza Abanyarwanda ko umutekano wabo urinzwe, akabasaba gukomeza gukorana umurava, bagasigasira iterambere ryamaze kugerwaho ndetse bakaribyaza umusaruro.

Hari mu kiganiro n’abanyamakuru.

Umukuru w’Igihugu kandi yasubije abanyamakuru ibibazo bitandukanye, birimo ikijyanye no guteza imbere ibikorerwa mu Rwanda, ngo bitujuje ubuziranenge ndetse bigurishwa ku giciro gihanitse. Yavuze ko ikibazo kigomba gukemurwa no gukora byinshi kandi bigahabwa ubuziranenge.

Perezida Kagame kandi yagize icyo avuga ku kibazo cy’abaterezwa cyamunara nyuma yo gusaba imyenda mu mabanki; aho ngo abenshi babiterwa n’uko bakoresha amafaranga icyo batayasabiye cyangwa bakayakoresha nabi.

Urugendo rwo kwibuka ku nshuro ya 22 jenoside yakorewe Abatutsi mu Rwanda mu 1994, ku rwego rw’igihugu, rwahereye ku Ngoro y’Inteko Ishinga Amategeko rugera kuri Stade Amahoro, ahari hateraniye imbaga y’Abanyarwanda n’inshuti zabo.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2700 )