Manirakiza w’imyaka 21 avuga ko yahoze akorera igisirikare ahitwa Mufuro ariko akaza kubireka akigira mu nkambi ya Rubaya yegeranye n’indi ya Kibabi zibarizwamo Abanyarwanda benshi bagera ku 2000.

Manirakiza avuga ko we n’abandi ba rwanyi ba FDLR 200 bakubiswe inshuro na Mayi Mayi Mutomboki bahitamo kujya kwibera mu nkambi aho bafashwa nk’izindi mpunzi zose, avuga ko uko bari mu gisirikare bayobowe na Col Kome bahise bigira mu nkambi ndetse bafata inshingano yo kuyirindira umutekano kuko ingabo za Congo FARDC zitahagera.

Kuba aba barwanyi ngo bacunga iyi nkambi bituma barakomeje ibikorwa bya gisirikare ndetse ngo benshi muri bo bakora ubucukuzi bw’amabuye y’agaciro ya kolta aho ikiro kigurishwa amafaranga 1800 y’amafaranga ya Congo.

Manirakiza avuga ko ubu bucuruzi butuma benshi mu barwanyi ba FDLR badashishikarira gutaha ahubwo bagakomeza kugurisha amabuye y’agaciro.

Manirakiza ati “nta kiza cyo kuba mu mashyamba ya Congo uretse ubujiji, mbere Abanyarwnada bashoboraga kwiga bagiye mu mashuri ya mayi mayi ariko ubu ntibishoboka, kugeza n’aho Col Kome n’abana be batiga.”

Akomeza agira ati: “njye nabanye na Col Kome hamwe n’umuryango we, ubwo twabaga ahitwa Kibabi, umwana we w’umusore ntiyigaga ahuwbo wasangaga yitwaza intwaro nkatwe, ndetse n’umukobwa wari ufite imyaka 10 nawe nta mashuri yajyagamo.”

Manirakiza avuga ko nubwo aribwo bwa mbere ageze mu Rwanda ngo ababyeyi be bajyaga bavuga ko bari batuye Ruhengeri Nyamutera ahitwa mu Kirango kandi yizera ko azashobora kubona umuryango we ndetse agashobora kugira ibikorwa by’iterambere ageraho nubwo avuga ko yataye igihe.

Sylidio Sebuharara