Ibi bibazo byo gushyira amananiza ku binjira muri Congo bije nyuma y’uko taliki 31/7/2013 umusore w’Umunyecongo yinjiye mu Rwanda agashaka gukubita umupolosi w’Umunyarwanda warimo gusaka, yafatwa n’inzego zishinzwe umutekano z’u Rwanda, ku ruhande rwa Congo hagafatwa abasore 9 b’Abanyarwanda harimo 4 bashoboye kurekurwa abandi batanu bakajyanwa ahantu hatazwi.

Kuri uyu wa Kane, inzego z’abashinzwe umutekano wa Congo ku mupaka muto bashyizeho uburyo bwo gusaka abava mu Rwanda inshuro 3 birimo no kureba ko yahetse igikapu cyangwa yambaye inkweto za bote bagahita babafata bakabatwara babashinja kuba abarwanyi ba M23.

Uwitwa Hakuzwimana wanze kwinjiza mu tuzu bajya gusakiramo abantu bagahita babajyana gufungirwa muri Kontineri ariho imodoka ya Gisirikare ibasanga ikabatwara yatangarije Kigali Today ko iyo basanze warambaye bote bahita bakwambura irangamuntu n’ibyo ufite bagahita bakwita umurwanyi wa M23.

Ntanyunguyumujinya we avuga ko hakenewe ubuvugizi kubera ko abatuye ku Gisenyi benshi bakunda kwambara bote kubera haba amakoro.

Ati “ kubera amakoro twambara bote, ubuzima bwacu ni ubwo kwikorera imyaka tujyana i Goma ndetse hakaba niyo dutwaye mu bikapu, none ngo uwariwe na bote cyangwa agaheka ibikapu ngo ni umurwanyi wa M23. Nahisemo kwanga kwinjira mu kazu nkibimenya banjugunya mu Rwanda nditahiye”.

Abashoboye kurunguruka muri Kontineri ifungirwamo abantu bavuga ko babonye abarenga 30 bafashwe uyu munsi kandi imodoka zirabatwara bagashyiramo abandi; nk’uko Mukarwego wabyiboneye abivuga.

Ibi bikorwa byo gusaka bikorwa n’inzego z’umutekano zambaye imyenda ya gisivire harimo n’abapolisi, abibasirwa ni abagabo n’abasore n’aho abakobwa n’abagore nta kibazo bagira.

Umuyobozi w’akarere ka Rubavu, Sheikh Bahame Hassan, washoboye kugera ku mupaka yatangarije Kigali Today ko abayobozi ba Congo ibyo bakora ari ukwiyenza ku Banyarwanda, avuga ko bahamagara abayobozi ngo bavugane ku bibazo biri kuba ariko ntabushake bwo kubavugisha.

Ati “twagerageje kuvugana n’abayobozi ntibabishaka, nyamara iyo urebye abinjira Congo barikoreye naho abavuye Congo ntacyo bafite. Abanyarwanda bagemurira umusaruro wacu Goma nyamara baragerayo bagahohoterwa.

Biteye agahinda gusa tubasaba kugabanya ingendo byaba ngombwa bakabireka kuko ubukungu bwa mbere bw’igihugu ni abaturage.”
Mu babujijwe kwambuka umupaka harimo n’Abanyecongo baza kurangura imyaka mu Rwanda bavuga ko ibikorwa n’inzego z’umutekano wabo bibarenze.

Ku ruhande rw’abakora ibikorwa by’isaka bavuga ko ari gahunda zabo bashyizeho kandi zigomba kubahirizwa mu kwicungira umutekano nkuko umwe yashoboye kubivugira ku mupaka.

Uretse ibi bikorwa bikorerwa ku mupaka muto uhuza Goma na Gisenyi, ku mupaka munini nta kibazo kiharangwa, ariko abaturage bajya Goma batangarije umunyamakuru wa Kigali today ko ibikorwa byo kwaka ibyangombwa Abanyarwanda bikorwa no mu mujyi wa Goma kugera Camp Katindo kandi abasore bafashwe ari Abanyarwanda ngo burizwaga imodoka.

Umupaka muto usanzwe ukoreshwa n’abantu bagera ku bihumbi 25 ku munsi kuko benshi ari Abanyarubavu na Goma bakoresha irangamuntu bakiyambukira badasabwe Laisser-passer.

Mu mezi atandatu ya nyuma y’umwaka 2012 ibyasohotse muri Rubavu bijya i Goma biciye ku mupaka muto bifite agaciro gasaga miliyari 10 na miliyoni 859 z’amafaranga y’u Rwanda naho ibyavuye Goma biza mu Rwanda bifite agaciro gasaga miliyari imwe na miliyoni 71.

Sylidio Sebuharara