Aba banyamakuru abavuga ko aba bayobozi cyangwa abakozi ba Leta banga kubaha amakuru bavuga ko hari umuvugizi umuvunyi yashyizeho ko batabirengaho.

Honore Ishimwe, umwe mu munyamakuru avuga ko yigeze kujya kuri kamwe mu turere two mu ntara y’Amajyepfo, umuyobozi bari kumwe mu nama, yajya kumusaba ko bavugana akamwangira, akamubwira ko bafite umuvugizi ngo abe ariwe abaza.

Uyu munyamakuru avuga ko yaje kujya gushaka uwo ushinzwe amakuru ariko ntiyamubona kuburyo byaje kumuviramo kudakora inkuru ye. Ati: “ibi bintu rwose byica ireme ry’itangazamakuru”.

Ishimwe avuga ko kenshi usanga aba bashinzwe gutanga amakuru nta makuru ahagije baba bafite kuri buri kimwe cyose basabwa n’itangazamakuru. Ibi bikaba bituma abanyamakuru batabona amakuru bifuza.

Nubwo itegeko riha uburenganzira abakozi batandukanye bwo kuba batatanga amakuru mu gihe ushinzwe kuyatanga ahari, Cartas Kabega ukora mu ishami rishinzwe kugenzura imyitwarire y’abayobozi mu rwego rw’umuvunyi avuga ko iri tegeko ritavanaho burundu inshingano abayobozi basanzwe bafite zerekeranye no gutanga amakuru.

Kabega ati: “itegeko ukuntu rivuga, ntabwo ribuza mayor cyangwa vice mayor gutanga amakuru, rivuga gusa ko agomba kuba ahari mu buryo buzwi, ni cyo itegeko rigambiriye ntabwo rigambiriye gukuraho mayor, vice mayor cyangwa undi, ashobora n’ubundi gukomeza kuyatanga”.

Itegeko numero 04/2013 ryo kuwa 08/02/2013 rigamije gufasha umuntu wese ukeneye amakuru kuyahabwa nta mananiza. Ni no mu rwego kandi rwo gufasha abayobozi mu gihe baba nta mwanya bafite wo gutanga amakuru.

Ishyirwaho ry’urwego rushinzwe gutanga amakuru mu bigo ryashyizweho nyuma y’aho urwego rw’umuvunyi rwandikiye minisiteri zitandukanye, ibigo bya Leta n’uturere rusaba ko bagena umuntu uhoraho ushinzwe kumenyekanisha amakuru.

Gerard GITOLI Mbabazi