Madamu wa Perezida wa Repubulika, Jeannette Kagame yasabye abo banyeshuri guteza imbere imico myiza aho bazaba bari hose, kurinda imibiri yabo kwangirika, kugira amatsiko yo kumenya byinshi haba mu gusoma no gushyira mu bikorwa ibyo biga, kandi bakirinda gukoresha ikoranabuhanga mu buryo bubangiza.

Cheni Andrew urangije kwiga imibare, ubugenge, ubutabire n’ubukungu, avuga ko agiye kwiga ibijyanye n’ubwubatsi, akazagaruka afasha igihugu mu gukemura ikibazo cy’imiturire, mu kubaka bagana hejuru aho kubaka umurambararo mu gihe bizwi ko abaturage mu Rwanda barushaho kwiyongera.

“Guhugira mu kazi, bikakurinda gutekereza no gukora ibibi”, nizo ntego Cheni ahuje na bagenzi be, Vanessa Mutoni na Keza Kampire, bavuga ko bajyanye aho bazaba bagiye kwiga mu mahanga.

Mutoni wize ibijyanye n’ubumenyamuntu(humanities), yongeraho ko yumvise impanuro za Mme Jeannette Kagame, z’uko agomba kugera mu mahanga akamaza umuco w’iwabo mu Rwanda, kandi akirinda kwiyandarika cyangwa gukururwa n’ibirangaza.

Nyuma ya 1994, ngo hari hakenewe uburezi bufite ireme kugirango buvane igihugu mu bibazo cyarimo, aho Green Hills yahise itangiza porogramu ziri ku kigero mpuzamahanga, nk’iya Cambridge na International Baccalaureate, zigishwa mu cyongereza, Igifaransa, Ikinyarwanda n’Ikidage, nk’uko Mme Jeannette Kagame yasobanuye.

Ati:” Hari icyizere ko Green Hills izungukira mu kwinjira mu ishyirahamwe ry’amashuri yisumbuye mpuzamahanga, harimo kubaka abaryigamo ubumuntu, hamwe kubaha ubumenyi bufite ireme.”

Aba banyeshuri bitezweho kumenya cyane cyane ibijyanye n’imibanire mpuzamahanga, ibidukikije, imiyoborere na serivisi, nk’uko Madamu wa Perezida wa Repubulika yabasabye.

Abashyikirijwe impamyabumenyi ku nshuro ya 11 na Madamu wa Perezida wa Repubulika, ni 52 barimo abakobwa 30 n’abahungu 22.

Green Hills yashinzwe n’ababyeyi barimo Mme Jeannette Kagame mu mwaka wa 1997, ikaba kugeza ubu yigamo abanyarwanda n’abanyamahanga bakomoka mu bihugu 12 biri ku migabane yose y’isi, ariko byiganjemo ibyo mu karere u Rwanda rurimo.

Simon Kamuzinzi