Uyu muryango AGHR(Associassion Generale Des Handicapes du Rwanda), wabisabye ubuyobozi bw’akarere ka Rutsiro tariki ya 29 Nzeli 2015, ubwo hatahwaga inzira z’abafite ubumuga ku rwunge rw’amashuri rwa Murunda.

Muri iri shuri mu kigo imbere ndetse no mu mashuri yose, hashyizwemo ibibaho byegereye hasi ku buryo abatabasha guhagarara babikoresha nk’uko n’abadafite ubumuga babikoresha.

Umuyobozi w’uru muryango, Nkundiye Zacharie, avuga ko abafite ubumuga batinya kugana ishuri kuko inzira zihari zitaborohereza kugera mu byumba by’ishuri ndetse n’ibibaho abarimu bigishirizaho bikaba bitabegereye.

Nyamara ngo iyo boroherejwe bajya ku ishuri kandi bagatsinda nk’abandi, akaba asaba ubuyobozi gukomeza kubishyiramo ingufu. Ati” kubaka ibikorwa remezo bifasha abafite ubumuga kugana ishuri ni ukugirango na bo babashe kubona uburenganzira bwo kwiga tugasaba ko ubuyobozi bwakomerezaho.”

Umuyobozi w’Akarere ka Rutsiro wungirije wushinzwe imibereho myiza, Nyirabagurinzira Jacqueline na we yemeza ko gahunda yo korohereza abafite ubuga ari nziza kandi ko akarere kanayitangiye cyakora inzira ikaba ikiri ndende.

Nyirabagurinzira ati “Iyi gahunda yo gushaka ibikorwa remezo bifasha abafite ubumuga kwiga ni nziza kandi nk’akarere twarabitangiye, aho amashuri mashya yubakwa tubyubahiriza ndetse n’aya kera, duufite gahunda yo kuzayavugurura tugashyiramo ibikorwa remezo byafasha abafite ubumuga kwiga.”

Mukamana Solange, afite ubumuga bw’ingingo, akaba yiga mu mwaka wa 5 w’indimi mu rwunge rw’amashuri rwa Murunda. Avuga ko ibikorwa remezo biborohereza kwiga, bituma batinyuka mu myigire. Yagize ati “Iyo haje inzira nk’izi zorohereza abafite ubumuga ndetse n’ibibaho biradutinyura kugana ishuri tukiga nk’abandi”.

Inzira zorohereza abafite ubumuga kugera ku ishuri n’ibibaho byatashywe byubatswe ku bufatanye bw’umuryango w’abafite ubumuga AGHR ndetse n’umuryango mpuzamahanga ufasha abafite ubumuga. Akarere kakaba kiyemeje gukomereza no mu bindi bigo by’amashuri.

Mbarushimana Cisse Aimable