Ibyo biraterwa n’uko iterambere isi igezemo risigaye rifasha abana kugira ubwenge bakiri bato kandi rimwe na rimwe hakaba hari ibyo baba bazi kurusha ababyeyi babo, nk’uko bitangazwa na Esther Okoth, ushinzwe ibikorwa mu muryango Nyafurika ushinzwe kurera abana (PAN).

Agira ati “Mu muco wa Kinyafurika nko gukubita umwana byafatwaga nko kumushyira ku murongo ariko kuri ubu hari politiki nshya leta zigenda zishyiraho zivuga ko gukubita umwana bidakwiye hari ubundi buryo wakoresha hatarimo gukubita”.

Yungamo ati “Ariko kuri ubu turifuza ko habaho uburyo ababyeyi bareramo umwana butuma nawe yiyumva mu byemezo bimufatirwa bitari nka kera umwana yumvaga ko abereyeho gukurikiza ibyo abwiwe gusa. Kuri iki gihe ibintu biri guhinduka kuko umwana agomba kugira uruhare mu bimukorerwa”.

Avuga ko ibyo bikwiye gutuma imirere y’iki gihe igira uruhare rwiza mu iterambere ry’umwana, nk’uko yabitangaje ubwo uyu muryango wagiranaga ibiganiro n’indi miryango ifite aho ihurira n’uburenganzira bw’umwana ikorera mu Rwanda.

Franklin Murangwa Gakuba, umujyanama mu iterambere ry’umuryango muri Minisiteri y’iterambere ry’umuryango (MIGEPROF), yatangaje ko kwihuza kw’imiryango irengera abana bishobora gufasha abana gukura badahohotewe.

Yatangaje kandi ko iyi miryango izana ubunararibonye bwayo ikuye hirya no hino bigahuriza hamwe ku buryo ibyemezo bifatirwa abana biba ari bijyanye n’uburere bwabo, ariko akifuza ko byajya bikorwa hakurikijwe umuco wa Kinyafurika.

PAN (Parenting in Africa Network) ni ihuriro ry’imiryango n’abantu bikorera ku giti cyabo bafite aho bahuriye n’uburenganzira bw’abana mu rwego rwo gukangurira ababyeyi gushyira imbere uburezi bw’abana bunoze, bwubahiriza umuco kandi bukajyana n’igihe.

Emmanuel N. Hitimana