Muri iyo mpanuka yakomerekeyemo abantu bane, bahise boherezwa ku bitaro by’i Kabgayi, abahaturiye bihutiye gutabara, bavana abantu mu modoka, mu gihe abandi bahamagaye Polisi bayimenyesha ko habaye impanuka, ndetse n’abataye ibyabo barabibashyikiriza.

Hiace yagonzwe.

Iyi mpanuka yaturutse ku migendere mibi y’ikamyo yari ifite pulaki zo mu gihugu cya Tanzaniya yaturukaga mu majyepfo, yagonze mu buryo bwo kwikuba byanangije imodoka ya mu bwoko bwa Hiace ifite pulaki RAC 484 D yaturukaga i Kigali yerekeza i Muhanga.

Imodoka ya Hiace yarimo abagenzi 18 yagendaga gahoro. Ababibonye batangajwe ukuntu yagonzwe dore ko yari no mu murongo wayo.

Mu gihe iyi mpanuka yamaraga kuba abagera kuri bane barimo umukobwa wari wakomeretse cyane ku gahanga hari hameze nk’ahakebwe n’ikintu kinjiyemo, bajyanywe ku bitaro bya Kabgayi n’imbangukiragutabara yavaga mu nzira za Kigali yerekeza i Muhanga.

Abaturage bagerageza gutabara abakomerekeye mu mpanuka.

Umwe mu baganga bakurikiranye abo bantu yavuze ko bageze Kabgayi nta n’umwe wapfuye uretse abo wabonaga batavuga kubera ububabare ariko ngo nabo baje kuvuga nyuma yo gukorerwa ubutabazi kuri ibyo bitaro.

Muri iyi minsi nyinshi mu mpanuka zikunze kugaragara mu ka Karere Kamonyi, ni iz’amakamyo manini atwaye imizigo, akunze kugwa mu makorosi yo ku muhanda munini wa Kaburimbo wa Kigali-Akanyaru.

Marie Josee Uwiringira