Ibi byagaragaye kuri tariki 22/01/2013, ubwo umugore utashatse ko amazina ye atangazwa yacakiraga umugabo amashinja ko yamusambanyije nyuma akaza kumutoroka atamwishyuye, maze sinzi uko yamurabutswe imbere y’isoko rya Kamembe, aba aramwanjamye ari nako yamusabaga kumwishyura ariko nyamugabo akabihakana.

Uyu mugore wipfutse mu maso yariraga avuga ko umugabo yamusambanyije ntamwishyure.

Ibi byatumye abantu bahurura ari benshi, umugabo wasabwaga kwishyura indaya ahita atoroka ariko kuko yarari kumwe na murumuna we, iyo ndaya imusaba ko yishyurira mukuru we ariko biranga, nuko amahane atangira ubwo, ari nako abagore bari mubahuruye bavuzaga induru bakwena mugenzi wabo ko abasebya.

Twagerageje kuvugana n’iyi ndaya yishyuzaga amafaranga y’uburyamo bw’umugabo wayitorotse, maze n’ikiniga cyinshi ntiyabasha kudusobanurira, ariko kubw’amahirwe haboneka umuturanyi we waje kutubwira uko byagenze.

Aha bagenzi be bamubuzaga gukomeza kwishyuza ngo kuko ari ukubasebya.

Iki gikorwa kigaragaza inyota ikabije y’ifaranga kugeza naho ibifatwa nk’ibanga bigeze naho bizajya bishyirwa ku karubanda, abagore bari aho ntibabyishimiye kugeza naho basabaga iyo ndaya ngo yihane kuko yabasebeje.

Abaturage twavuganye batubwiye ko bifuza ko Leta yari ikwiye gushaka uburyo abakora umwuga w’uburaya bashakirwa ibihano ugacibwa cyangwa se ukemerwa hagashyirwaho n’itegeko riwugenga naho ubundi ngo ufite ibibi byinshi., birimo gusenya ingo n’ubwiyongere bwa virusi itera Sida.

Musabwa Euphrem