Byabereye mu Mudugudu wa Murambi mu Kagari ka Rwesero ko mu Murenge wa Busasamana mu ijoro rishyira iryo ku cyumweru tariki 24 Mutarama 2016.

Mukeshimana w’imyaka 39, avuga ko uwamurumye , witwa Kayitare Alexandre wo mu kigero cy’imyaka nka 45, yari amaze iminsi mike aharaye kunywera inzoga aho iwe mu rugo.

Ngo ku wa gatanu w’icyumweru gishize yagorobereje mu kabari ka Mukeshimana ndetse anamwingingira ko basangira inzonga ariko Mukeshimana aranga, kuko ngo yari ku miti ya Malariya.

Mukeshimana agira ati "Gusa we yakomeje kuhisirisimba abandi barataha, we yanga gutaha ni bwo namusohoye ndamukingirana aragenda.”

Akomeza avuga ko ku wa gatandatu w’icyumwru gishize Kayitare yongeye kugaruka kuhanywera anagurira abandi bantu yahasanze.

Bigeze mu gicuku abo bari kumwe ngo baratashye, hasigaye abantu bake umwana wahaga Kayitare inzoga ngo yamusabye kwishyura aranga, amubwira ko amafaranga ayihera uwo mugore nyir’akabari.

Mu gihe yasabwaga na Mukeshimana kwishyura 5.200FRW yanywereye ngo yahise amukurura aramwiyegereza amuruma izuru arivanaho ritakara hasi.

Abari kumwe na Kayitare muri ako kabari ngo bahise bamufata bamushyikiriza Sitasiyo ya Polisi ya Busasamana.

Mukeshimana we bahise bamujyana ku Bitaro bya Nyanza izuru rye baritwaye mu ishashi kurimusubizaho biranga baramupfuka.

Kayitare ukurikiranweho urwo rugomo avuga ko ntacyo yicuza, nk’uko bamwe mu baturanyi batabaye urwo rugomo rukimara kuba babivuga.