Akigera mu murenge wa Rwabicuma yakiriwe n’umuturage waho aramucumbikira maze bukeye amujyana ku biro by’uwo murenge kugira ngo ahabwe ubundi bufasha bwisumbuye.

Kubera umunaniro mwinshi yari afite uvanze n’inyota n’inzara yitaweho n’ikigo nderabuzima cya Nyarusange mu gihe ubuyobozi bw’umurenge wa Rwabicuma bwari bugishakisha amakuru yaho yaje aturuka ndetse n’impamvu yahamuvanye.

Amakuru y’ibanze yashoboye kumenyekana ngo n’uko uwo mwana w’umukobwa akimara guterwa iyo nda iwabo batangiye kumufata nabi bakajya bamusaba gusanga uwayimuteye.

Mu buhamya bwe yahaye Kigali Today yavuze ko ibyo byatumye ahungira kwa mukuru we ariko ngo nabwo byabaye nko guhungira ubwayi mu rubingo kuko nawe yatangiye kumwinuba kugeza igihe ahaviriye amutorotse.

Uwantege Josephine ushinzwe imibereho myiza y’abaturage mu murenge wa Rwabicuma ari naho uwo mwana w’umukobwa yari acumbikiwe yavuze ko bavuganye n’ubuyobozi bw’iwabo aho akomoka bugasaba ko uwo mwana yakoherezwa bagakurikirana ikibazo cye ndetse n’uburyo ashobora kurindwa iryo hohoterwa.

Mbere y’uko yoherezwa iwabo mu karere ka Bugesera yahinduriwe imyenda kuko iyo yari afite yari yaramusaziyeho kandi yanduye ndetse anambikwa inkweto kuko yavuye iwabo yambaye ibirenge.

Tuvugana n’uwo mwana w’umukobwa icyo yifuza ko yakorerwa yasabye ko gushakirwa aho kuba ngo kuko aramutse asubiye iwabo nabwo nta mahoro ateganya kuhagirira gusa ubuyobozi w’umurenge w’iwabo bwizeza ko imibereho ye izakomeza gukurikiranirwa hafi kugeza igihe azabyarira uwo mwana atwite wabaye intandaro yo guhora atotezwa.

Jean Pierre Twizeyeyezu