Sembagare Samuel aratangaza ibi mu gihe hari bamwe mu baturage bakwiza amakuru atariyo ku buryo bituma abaturage batagira umutekano mu mutwe kandi u Rwanda rufite umutekano usesuye.

Akomeza avuga ko abantu nk’abo ari ukubamaganira kure. Agira ati “Umuntu rero uzana igihuha ni umwanzi w’iguhugu. Uwumva za Radio za rutwitsi akavuga ibyo atazi, abo nabo ni abanzi b’igihugu kuko bashaka kuzana umutekano mucye mu mitwe y’abaturage.”

Uyu muyobozi yatangaje ibi tariki 16/01/2013 ubwo ubuyobozi bw’akarere ka Burera ndetse n’inzego zishinzwe umutekano bagiranaga inama n’abaturage bo mu mirenge ya Cyanika ndetse na Kagogo mu rwego rwo kubakangurira kubungabunga umutekano.

Iyi nama yabaye nyuma y’uko ku mugoroba wo ku itariki 15/01/2013 muri santere ya Kurwibikonde ihuriweho n’iyo mirenge, harasirwaga abantu batatu bari mu modoka ya Fuso maze umwe muri bo akahasiga ubuzima abandi bakajyanwa kwa muganga.

Muri iyo nama abaturage basabwe kujya batanga amakuru ku gihe mbere y’uko icyaha kiba kandi bagatanga amakuru yizewe. Ari nabwo basabwaga kwirinda ibihuha bibunzwa na bamwe muri abo baturajye.

Norbert Niyizurugero