Imibiri y’Abagande barashwe binjiza magendu mu Rwanda yashyikirijwe bene yo

Job Ebyarishanga na Bosco Tuheirwe binjiye mu Rwanda banyuze mu murenge wa Tabagwe na bagenzi babo ari agatsiko k’abantu barenga umunani.

Hari saa cyenda mu rukerera rwo ku cyumweru tariki 10 Ugushyingo 2019, bose bari bikoreye itabi ry’ibibabi.

Umuyobozi w’akarere ka Nyagatare, Mushabe David Claudian, avuga ko bageze hafi y’ikigonderabuzima cya Tabagwe bahagaritswe n’abapolisi aho guhagarara batangira kubarwanya.

Mu kwirwanaho, babiri bararashwe abandi batura hasi ibyo bari bikoreye bariruka basubira iwabo.

Yasabye ubuyobozi bw’akarere ka Rukiga, ko mu nama bakorana n’abaturage babashishikariza kureka ubucuruzi butemewe, kandi bakanyura mu nzira zemewe n’amategeko kuko zizwi.

Mushabe David Claudian yasabye ubuyobozi bwa Rukiga gushishikariza abaturage babo gukora ubucuruzi bwemewe

Ati “Nagira ngo mbisabire bayobozi, gukora ubukangurambaga buhoraho mu nama mukorana n’abaturage, kuko aba bantu barazwi, gukoresha inzira zitemewe ntitubyemera n’ubucuruzi butemewe ntitubwemera, bakoreshe inzira zemewe zirazwi kandi bakore ubucuruzi bwemewe”.

Umuyobozi w’akarere ka Rukiga, Pulkeria Muhindo, yashimiye Leta y’u Rwanda kuko yafashe neza imibiri y’ababo bishwe, ndetse ikaba yanayibashyikirije.

Na we avuga ko badashyigikiye ubucuruzi butemewe iwabo, bityo ko bagiye kuganira n’abaturage babo bakabicikaho.

Nyuma yo gufata imibiri y’abaturage babo basubiye mu gihugu cyabo

Agira ati “Twababajwe n’uko twabuze abantu bacu, ariko na none twishimiye ko mubatuzaniye, reka duhagarare ku bucuti hagati y’u Rwanda na Uganda, kubera ko turi abaturanyi bivuze ko turi abavandimwe kandi nk’uko mubivuze tuzakomeza kubwira abaturage bacu ko bagomba kureka ubucuruzi butemewe kuko na Uganda ntibukeneye”.

Umuyobozi wa Police mu ntara y’Iburasirazuba, ACP Emmanuel Hatari, avuga ko ubucuruzi butemewe muri iyi ntara bukunze kugaragara mu turere duhana imbibi n’ibihugu bituranyi, ariko bugakorwa cyane mu karere ka Nyagatare ugereranyije na Bugesera na Kirehe.

Avuga kandi ko bukorwa n’Abanyarwanda ndetse n’abaturage b’ibihugu bahana imbibi.

Mbere y’uko Abanyarwanda bagaruka mu gihugu babanje gupimwa Ebola kuko bari bahuye n’Abagande kandi yaragaragayeyo

Asaba Abanyarwanda by’umwihariko kubucikaho kuko uzabirengaho azajya ahanwa hakurikijwe amategeko kandi na yo yakajijwe.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1819 )