Uwo mukecuru yari ageze iwe mu rugo avuye gusenga, imvura ihita itangira kugwa, asohoka hanze agiye gutega amazi, mu gihe ahindukiye arimo yinjira mu nzu inkuba iba irakubise, umukecuru yitura hasi ahita ashiramo umwuka, nk’uko byasobanuwe n’umukobwa we witwa Mukamuhire bari kumwe ubwo iyo nkuba yakubitaga.

Ayinkamiye yitabye Imana mu gihe yiteguraga ubukwe bw’umukobwa we yendaga gushyingira, dore ko asize ataze n’ibitoki byari kuzifashishwa muri ubwo bukwe.

Abandi bantu batatu bo mu gace uwo mukecuru yari aherereyemo barahungabanye, babiri bajyanwa kwa muganga kubera ko bari barembye cyane, nyuma baza kugenda boroherwa.

Niyitegeka Emmanuel uyobora umudugudu wa Mukebera uwo mukecuru yari atuyemo avuga ko urupfu rwe ari igihombo gikomeye kuko yari umwe mu bantu bakuru batangaga inama n’ibitekerezo byubaka kandi ngo yari n’umuntu w’inyangamugayo witabiraga na gahunda za Leta.

Inkuba ni kimwe mu bihangayikishije abaturage b’akarere ka Rutsiro kuko zimaze gutwara ubuzima bw’abatari bake, ibyo bigatuma igihe imvura iguye, buri wese yumva ko inkuba ishobora kumutwara.

Mu nama zitandukanye, abaturage bakunda kwibutswa gukora ibishobora ngo birinde inkuba birimo nko kwirinda kugenda mu mvura mu gihe irimo kugwa, kwirinda kugama imvura munsi y’ibiti, gukuraho ibintu byose bicometse ku muriro w’amashanyarazi, kwirinda kuvugira kuri telefoni mu gihe imvura irimo kugwa, gushyiraho imirindankuba hejuru y’amazu, n’ibindi.

Malachie Hakizimana